Actualisacion ariba status di negociacion cu Hulanda; Prome Minister: “Unico manera cu por sali di e situacion ta pa traha ariba otro rijkswet, pa Hulanda e ta keda importante”

Ayera durante conferencia di prensa di Gobierno di Aruba, Prome Minister, Evelyn Wever-Croes, a duna actualisacion ariba e status di negociacionnan cu Hulanda pa loke ta trata e Ley di Reino di Supervision Finanaciero (RAft) y e debe di COVID-19 cu ta vence dia 10 di october, y a elabora ariba e proposicionnan cu Gobierno di Aruba a manda pa Hulanda pa trece un solucion na e situacion.

Prome Minister a splica cu siman pasa dialuna durante otro conferencia di prensa el a duna un relato extenso tocante con e negociacionnan a bay riba e tema. A bay back na aña 2020 ora cu e pandemia di COVID-19 a cuminsa y e necesidad pa a yega na palabracionnan cu Hulanda.

El a remarca cu desde juni di 2022 Gobierno di Aruba a cuminsa papia cu Hulanda pa wak con ta haci pa paga back e debe aki y cu a haci diferente proposicion, tanto riba nivel aambtelijk como riba nivel di gobierno, bestuurlijk.

Prome Minister a splica cu e prome carta cu gobierno a manda tabata data 7 di februari 2023 y tabata dirigi na Secretario di Estado, Alexandra van Huffelen, cual ta bisa cu ya caba desde juni 2022 Gobierno di Aruba a haci dos proposicion na Hulanda pa sali for di e debe.

E motibo pakico a cuminsa cu e palabracionnan den luna di juni 2022, el a indica, ta pasobra ya caba na mei 2022 Parlamento di Aruba den su totalidad a expresa cu nan no ta di acuerdo cu e RAft na e manera cu e tabata na e momentonan ey.

“Tur fraccion den Parlamento di Aruba tabata critico, tur a pidi pa cambia cierto cosnan, algun a manda 30 pagina di cambio, otro a manda un pagina di cambio, pero tur a pidi pa cambio. Na e momento ey nos a saca afo tambe cu e mayoria den parlamento no ta sostene e idea di un rijkswet, otro nan si tabata sostene un rijkswet cu cambio, pero no e partidonan mas grandi y consecuentemente no tabatin sosten pa un rijkswet,” el a indica.

Pa e motibo aki, el a agrega, den e carta di dia 7 di februari nan a propone pa bay na un onderlinge regeling, en bes di un rijkswet, cual tabata e caso tambe cu COHO, pero e proposicion aki Hulanda a rechasa.

El a sigui splica cu den e mesun reunion di juni 2022, y Gobierno di Aruba a ripiti esaki den e carta di 7 di februari tambe, nan a propone e di dos oferta cual tabata pa laga e LAft manera cu e ta, pero ta agrega algun clausula adicional cu ta laga Hulanda sinti mas confortabel pasobra, segun Prome Minister ta señala, Hulanda ta buscando comfort pasobra nan no kier pa Aruba unilateralmente cambia e ley di LAft.

Den e mesun carta, el a indica, nan a propone pa pone mas clausula den e ley cu ta stroba un gobierno y parlamento cambia e ley aki sin mas, pero ambos peticion a wordo rechasa door di Hulanda.

E siguiente oferta, Prome Minister a sigui splica, nan a manda den un carta di dia 17 di juli den cual nan ta referi back na un reunion cu a tuma luga na Aruba dia 4 di juli 2023 cu Secretario di Estado van Huffelen, den cual a participa, apart di Minister di Finanzas, e vice Prome Minister Ursell Arends y Minister di Asuntonan Economico, Geoffrey Wever.

Den e carta aki Gobierno di Aruba a pone riba papel kico ta e proposicion cu a haci dia 4 di juli den e reunionan. E proposicion ta, si Hulanda su preocupacion ta cu Aruba por cambia unilateralmente e ley, pa fia e placa na e interes abao y si den futuro un gobierno y un parlamento dicidi cu nan ta bay cambia esaki, ta hisa e interes automaticamente y bay na un interes halto.

“Nos a elabora ariba esaki pues pa ankra esaki den e leningsvoorwaarden y cu nan ta conta mientras cu tin e debe. Den e reunion esey a wordo rechasa pero asina mes nos a haya importante pa toch elabora mas extensamente riba dje, pero despues a haya contesta cu e ta wordo rechasa di dos biaha,” el a remarca.

Den un tercer carta, data 31 di augustus 2023, a presenta un opcion nobo, e ‘hoofdlijnen akoord’. Den e carta aki, Prome Minister a agrega, a mustra tambe cu ya caba dia 29, 30 y 31 di augustus tabatin combersacion cu a tuma luga riba e proposicion aki cu a wordo rechasa riba nivel aambtelijk, pero despues den un carta di 6 di september, Secretario di Estado van Huffelen a indica cu e ta dispuesto pa papia ariba e opcion aki den cual Gobierno di Aruba a presenta un solucion hibrido y aworaki e negociacionnan ta na e punto aki

Prome Minister a informa tambe cu siman pasa na New York el a reuni extensamente cu Secretario di Estado, Alexandra van Huffelen y despues cu Premier Rutte hunto cu e Secretario di Estado.

El a splica cu e kier a compronde for di ambos dicon nan tin asina tanto problema cu e supervision mester wordo regla den un rijkswet. Segun el a indica, Secretario di Estado van Huffelen y Premier Rutte a splica cu nan kier evita cu despues di e Gabinete Wever-Croes “bin un gobierno iresponsabel atrobe y neglisha tur norma y palabracion y cu e pueblo di Aruba ta hay’e un biaha mas ta carga pa e debenan di un gobierno iresponsabel.”

Prome Minister a splica cu el a informa na van Huffelen y Rutte cu Parlamento di Aruba a pasa un mocion pa elimina e RAft, pasobra e ta basa riba un consensus y si no tin consensus, no tin rijkswet. “Unico manera cu por sali di e situacion ta pa traha ariba otro rijkswet, pa Hulanda e ta keda importante,” el a subraya.

Por ultimo el a indica cu a splica Hulanda ariba e intencion cu tin cu e propuesta hibrido y lo reuni ariba esaki. El a remarca cu si yega na un acuerdo prome cu fin di aña, Hulanda ta dispuesto pa presta e interes na 5.1% y si esaki no ta e caso, e ta bira entre 6% y 8% y segun calculacionnan pa Aruba esaki lo ta mas cerca di e 6% cu e lo ta di e 8%.