Lider di partido Curpa Eric Ras: Partido Curpa ta e unico partido cu ta garantisa un maneho segun leynan di dios

Nos por a tende cu parlamentario Tevreden ta pidi pa laga politica un banda y pa uni pa enfrenta Hulanda riba e RAFT. Nos ta kere cu Tevreden no ta mira e holoshi bon paso e ora a pasa dia caba. Awor ta 5 pasa di Dios y e baca a hoga. For di 2018 Hulanda a firma protocol cu nos prome minister pero te dia di awe nos prome minister no ta cumpli. Ora tabata tin tempo pa gobierno bin cu un cumbre pa asina haya un base amplio y solido nos gobierno a prefera di hunga politica cu e asunto. Tevreden ta desea union, pero unda el a keda ora nos prome minister scondi a biaha pa Hulanda pa firma e acuerdo. Tevreden mester acepta cu gobierno a hunga cu e macaco y el a saca su wowo.

Riba dje partido MEP kier yama Hulanda pa sinberguensa paso Hulanda ta cobra Aruba un risico interes ariba interes normal riba e 916 miyon cu pais Aruba a fia y cu esey ta un ganashi pa Hulanda. Si nos mira den e periodo (2001-2009) di gobernacion di partido MEP a subi Mercado internacional tambe gobierno mester a paga un risico interes riba e interes normal. Pais Aruba ta pagando e interesnan aki sin busca hende pa difama. Awor ken ta mas sinberguensa cu Hulanda ora gobierno di Aruba, partido MEP y partido AVP, a fia mas cu 5 biyon florin y mester paga un risico interes riba e interes normal paso ta algo normal cu e financiado ta cobra. Si esey ta algo normal cu ta cobra kiermen cu esey ta haci partido MEP un gañado cu kier instigando inhustamente contra di Hulanda mientras e gobierno nan aki mes a firma ora a fia 5 biyon florin. E risico interes cu Aruba mester paga ta keda chikito compara esun di e 5 biyon florin compara e mega interes cu e gobierno di partido MEP y partido AVP cu a hinca Aruba den e mega debe.

Nos no ta kere cu e gobierno aki por negocia cu Hulanda pa locual ta trata e placa cu a fia na aña 2020. A habri man tuma e placa y a hunga politica cu sentimento di nos pueblo durante campaña 2021 ora a bisa cu si kier fase sigui anto mester vota MEP. Eleccion a pasa, fase a caba y lo demas ta puro historia sin contenido. Mega debe tin nomber partido MEP y fam partido AVP. Awe pueblo tin un debe di mas 6 biyon florin. Si nos gobiernonan for di 2001 bin ariba a sa di administra placa di pueblo awe nos grandinan no mester paga pa nan remedinan, nan lo tin un bon pensioen pa hiba un bida digno, esnan sin trabao lo por tin un miho bida y muchanan no mester bay scol stoma bashi ni paga un schoolgeld asina caro. No tabata tin mester hisa tarifa di awa y electricidad y sigur lo no tabata ningun BBO pio BBO na frontera cu tin pueblo horca y gobierno lo no mester cobra asina tanto accijns pa haci e gasolin mas caro cu otro islanan di Caribe Hulandes.

Solucion tin pero e gobierno aki no por trece ningun solucion paso nan ta forma parti di e gobierno cu a destrui Aruba su economia. Aruba mester un gobierno di hendenan cu ta haci locual cu nan ta papia. Nos ta corda cu durante campaña partido MEP tabata tin su programa di gobernacion y e tabata asina gordo cu e ta parce el libro de petete. Si pueblo tabata sa cu e libro de petete ta solamente medida tabata para den dje awe partido MEP lo no ta den gobierno y lo a hiba un derota manera 1985 tempo cu partido MEP a perde 5 asiento.

Pueblo e palabra di Dios ta bisa pa nos hala for di nos mal caminda y pidi Dios pordon. Dios lo sana nos tera y pueblo lo por mira Aruba florece. Nos tin 37 aña den Status Aparte y Aruba a wordo goberna pa hendenan cu no ta stima Aruba y pa hendenan sin principio. Sabiduria humano a demostra cu e no ta garantisa bienestar pa nos pueblo. Esaki ta tempo pa pone confiansa den hendenan cu tin temor di Dios y cu no ta bay contra leynan di Dios. Tur partidonan politico cu ta bay contra leynan di Dios lo recoge nan cosecha pa locual cu nan a sembra. Ningun hende por burla di Dios y sali sin consecuencia. P’esey mes partido Curpa ta keda e unico alternativa.