(NTN24) – E cifranan di femicidio na Venezuela ta keda un motibo pa alarma, segun Observatorio Digital di Femicidio di Centro di Husticia y Paz (Cepaz). Den prome siete dia di luna di september tabatin tres femicidio consuma y cuatro den grado di frustracion. Den promedio, tabatin un accion femicida cada 24 ora.
Di su banda, den weekend e ONG Utopix a publica un comunicado den cual a contabilisa 139 asesinato di muhe entre januari y augustus di 2023. Apenas den september, a reporta 18 caso.
Ambos organisacion ta insisti cu ta imprescindible pa aplica un plan di emergencia cu ta contene herment di prevencion, atencion y mitigacion di violencia contra hende muhe, mucha y adolescente na e pais.
“Den e prome ocho luna di aña 2023, ya a conta un total di 139 femicidio na nivel nacional cu a keda publica den medionan di comunicacion. Nos ta sigui alerta y mirando cu preocupacion cu for di e estado no ta existi ningun propuesta concreto pa enfrenta e problema aki cu ta afecta e pais di manera structural,” segun e organisacion a indica den un comunicado.
Tocante e asesinato di hende muhe registra na augustus, siete tabata cu arma di candela, seis cu arma blanco y dos cu “violencia obstetrico,” un cu golpi, y den otro “ta kere cu por a tira e victima for di un haltura,” segun e ONG a detaya sin specifica e caso restante.
Juli ultimo, fiscal general Tarek William Saab, a informa cu al menos 628 muhe a ser asesina na Venezuela desde 2018 pa hombernan cu a forma parti di e bida di nan victima, mayoria di nan como pareha sentimental.
A agrega cu a conta 636 femicidio den grado di frustracion y cu Ministerio Publico a presenta 1,208 acusacion dilanti tribunal y a solicita 340 orden di aprehension, sin precisa un total di persona condena pa e hechonan aki.
