(AP) – Sophie turner a demanda su ex pareha Joe Jonas riba diahuebs pa obliga su persona entrega e paspoort di su dos yiu muhenan pa asina e por bay cu nan Inglatera.
Turner, ken a ricibi documentonan pidiendo divorcio durante e luna aki despues di 4 aña di matrimonio cu Jonas, a bisa den su peticion cu e tin plan di cria nan yiunan na Inglatera. Tambe el a bisa cu tur dos, di 3 y 1 aña, “ta completamente involucra y integra den tur aspecto di bida diario y cultural di Inglatera.”
Miho conoci pa su rol como sansa Stark den e serie Game of Thrones, Turned a entrega su peticion na corte federal di New york bao e clausa di secuestro di mucha di Hague Convention, un acuerdo internacional cu ta pidi e regreso di un mucha cu ser saca for di su “pais di residencia habitual”. Turner, ken tin 27 aña, a bisa cu su persona y Jonas, di 34 aña, a tuma e decision mutuo di cria e muchanan na Inglatera y tabatin plan di muda pa e pais den april di aña aki.
Durante porcion di augustus y september, mientras Jonas a cuminsa su tour cu The Jonas Brothers na Merca, Turner a cuminsa traha oranan largo grabando un serie di television na Inglatera. Esaki ta nifica cu nan a yega e acuerdo cu e muchanan lo biaha cu Jonas y un babysitter. E plan tabata pa Turner biaha bay New York despues cu e grabacion caba pa busca e muchanan, sinembargo mientrastanto e “kibramento di e matrimonio a pasa direpente,” Turner a declara.
Segun Turner, Jonas a pidi divorcio na Florida dia 1 di september y el a haya sa di esaki via rednan social riba dia 5 di september. E pareha a duna un declaracion conhunto riba nan cuentanan di instagram dia 6 di september bisando cu esaki tabata un decision mutuo.
Turner a comenta cu el a mira Jonas dia 17 di september y a pidi e paspoort di e muchanan pa e por bay cu nan back Inglatera, sinembargo Jonas no kier a otorga e paspoort di e muchanan, kende ambos ta na Merca y tin ciudadania di Inglatera y Merca. Documento di corte ta bisa cu e muchanan ta bibando cu Turner temporariamente na un hotel di Manhattan.
Jonas a bisa den un declaracion cu e ta “buscando cria e muchanan conhuntame pa asina e muchanan crece cu ambos nan tata y nan mama” y cu e ta “di acuerdo cu e muchanan ser cria ambos na Merca y Reino Uni.”
“e ta un desacuerdo legal desafortuna tocante un matrimonio cu tristemente ta cabando,” el a agrega. “Ora cu usa lenguahe manera ‘secuestro’, esaki ta duna un mal imagen, cual ta un abuso serio di e sistema legal.” Jonas a declara tambe cu e no a sorprende Turner cu e divorcio, sino a pidi esaki despues di loke el a yama “varios combersacion cu Sophie.”
