Recientemente, Minister di Cultura, Xiomara Maduro, tabata un di e invitadonan di Artisa pa presencia e desvelacion di e mural di e artista local Paul Wong. E atardi aki a cuminsa cu un tour duna door di Tito Bolivar caminda cu a presencia un obra di mosaik na comienso di caya grandi di Omaira Silva. E obra aki, un octopus completamente traha di mosaik, ta un bunita adicion na e cayanan di San Nicolas.
Despues di esaki e tour a sigui pa e siguiente stop cu tabata un mural 3D di e nomber di Aruba, traha pa nos artista local Robert Solognier, miho conoci como Ice One. E obra aki ta un obra cu ta captiva tur esnan cu pasa mir’e mirando cu e ta consisti di diferente componentenan cu ta forma nos Pais, manera San Nicolas store, Kapel di Alto Vista y e Lighthouse pa menciona algun. Sin duda un mural cu ta duna realse na locual ta haci nos Pais uno unico.
Finalmente, e tour a caba cu e desvelacion di e mural di Paul Wong titula ‘Mi forsa’ cu ta e escudo di Aruba traha den forma cu e leon ta haya un bida, cu e palabranan “un tin nada pa kibr’e”, poniendo enfasis riba e forsa di nos Pais. Minister Maduro ta gradici Artisa pa e invitacion y tambe ta gradici tur artista cu a duna nan contribucion na e Aruba Art Fair, creando obranan unico un biaha mas pa tur esnan cu bishita por admira. Un invitacion ta bay pa tur esnan cu no a bishita San Nicolas ainda, pa pasa y admira e obranan di mas nobo.
