(ElNacional) – Un grupo di Venezolano a reclama diamars ultimo na Times Square, den centro di New York, Merca, pa e comunidad internacional reuni den Asamblea General di ONU exigi presidente Nicolas Maduro cera e centronan di tortura operativo na e pais y libera alrededor di 300 preso politico.
Pa esey, un centenar di activistanan a presenta na e plaza cu t-shirtnan preto y a ofrece na e personanan pasando e experiencia di drenta mediante brilnan di realidad virtual den e Helicoide, un centro di detencion ubica na Caracas y cu algun ta cualifica manera e centro di tortura mas grandi di Latino America.
Liderando e grupo tabata Victor Navarro, un periodista cu ta dirigi e organisacion Voces de la Memoria y cu hunto cu un ekipo di 30 persona cu tabata presonan politico, manera su mes, a diseña e experiencia aki cu ta recrea e condicionnan terible di e celnan y ta permiti scucha testimonionan den prome persona.
“E personanan ta mirando y ta scuchando tortura, mirando con un preso politico ta biba den e condicionnan cu Maduro ta usa awendia pa tortura na Venezula,” Navarro a bisa na EFE, cu a recorda con na 2018 agentenan di e servicio di inteligencia (Sebin) a drenta su cas y hib’e na Helicoide, unda cu el a keda cera durante cinco luna.
“Tur dia ta di tortura, pasobra nan ta busca kita e humanidad di e parti mas intimo di bo persona y nunca bo no sa si bo ta bay sali; nan ta hunga cu bo mente y nan ta tortura bo,” e hoben a conta, cu awendia tin status de refugiado na Argentina y cu a acudi cu otro Venezolanonan cu a yega for di diferente parti di mundo pa halsa nan voz na New York.
