(NLTimes)—Den oranan di anochi entre diamars y diaranson, tabatin dos explosion mas den e parti noord di Hulanda; un cu a tuma luga na un cas na Windschoten y e otro na un negoshi na Oude Pekela. Te awo e aña aki, tabatin 358 explosion tumando luga na diferente cas y negoshi rond Hulanda, segun NOS a reporta a base di cifranan policial. Esaki ta hopi mas cu e 227 explosion cu a tuma luga den henter 2022.
Rond 11:35 di anochi diamars, un explosion a sosode na un negoshi riba Feike Clockstraat na Oude Pekela. E compania envolvi ta un salon di beyesa y manicurista, segun RTV Noord. Ningun hende a sali herida den e incidente, polis di Groningen a informa via X.
E explosion na Windschoten a tuma luga na un cas riba Wezellaan rond 2:35 diaranson anochi, polis a bisa. Den e incidente aki, ningun hende tampoco a sali herida y e polis ta investigando e caso. Segun AT5, tabatin un otro explosion na Amsterdam. E atake aki tabata dirigi riba un salon di cabey riba Burgemeester de Vlugtlaan na Nieuw-West rond 3or di marduga. E explosion a kibra varios bentana, pero ningun hende a sali herida.
Mas cu mita di e atakenan e aña aki a sosode na Rotterdam y Amsterdam. Tabatin 112 explosion den e region di Rotterdam, 99 na Amsterdam y 35 na Den Haag. Pero e tipo di atakenan aki ta pasa pafo di e ciudadnan grandi aki tambe. E explosion di diaranson mainta tabata e di tres riba Windschoten desde diasabra cu a pasa, por ehempel. Explosionnan den pasado tabata dirigi na salonnan di beyesa y un tienda di wega riba Langestraat diamars y diasabra, respectivamente.
E cuerpo policial ta kere cu hopi di e explosionnan aki ta relata na crimen di droga. Organisacionnan criminal sa paga hobennan mil euro pa tira klapchi na un hende su cas of negoshi. E hoben sospechoso mayoria bes no ta realisa cu nan ta cometiendo un crimen serio, segun hefe di polis na Rotterdam, Fred Westerbeke. Na ta tira klapchi durante aña nobo toch, pakico esaki lo ta diferente, nan por pensa. Segun e Consehero di Ciudad, Fathiya Abdi, e reclutamento sa pasa via Telegram, y e kier pa gobierno prohibi e app aki.
Sinembargo, segun criminologo Jasper van der Kemp, no tur explosion ta relata na e mundo di crimen: “Esaki sa pasa cu hende cu ta pleitando cu otro,” el a conta NOS. “E no mester ta ni algo severo. Esaki tambe por envolve hende cu ta pleitando y tin acceso na e tipo di klapchinan ey.”
Comportamento “copycat” tambe ta hunga un rol, van Kemp a bisa: “E idea ta: esaki ta algo cu ta traha. E ta relativamente facil pa crea miedo asina.” Hende ta causa explosion pa demostra otro cu “nos sa unda bo ta y nos por haya bo,” manera el a splica.
