Dialuna y diamars ultimo minister di Turismo Dangui Oduber a atende e Global Travel Conference organisa pa Aruba Tourism Authority (ATA). Dialuna e mandatario a hiba algun palabra yamando Bonbini na tur e invitadonan y socionan di mercado Norte Americano, Canades, Latino Americano y Europeo.
E Global Travel Conference ta di dia 18 pa 22 di september, den total tin 58 participante (Tour Operators y Aerolineanan) di 16 diferente pais participando na e conferencia. E meta di e conferencia aki ta pa e socionan den turismo bin Aruba y experencia kico Aruba tin di ofrece turisticamente y tambe haya informacion riba desaroyonan cu ta andando di producto Aruba. Pa asina e socionan conoce otro y traha riba futuro negoshinan for di nan pais pa Aruba.
Un conferencia pa estrena Aruba na nos socionan pa asina nan por conoce e vision y maneho di turismo como tambe Aruba su historia y cultura. Durante e programa e participantenan lo experencia Aruba di mesun manera cu e biaheronan lo experencia segun e tendencianan di biahe pa aña 2024.
Finalmente minister Dangui Oduber a yama danki na Aruba Tourism Authority pa organisa e reunion Global Travel Conference y tambe tur esnan cu di un manera of otro ta contribui na e turismo di Aruba. Turismo ta keda e driver principal di economia.
