Ayera tardi e seleccion di damas di Aruba a biaha rumbo pa Belize y despues pa Turks and Caicos na unda nan ta bay hunga weganan di clasificacion pa e CONCACAF Women’s Gold Cup.
E CONCACAF Women’s Gold Cup ta un torneo cu ta wordo organisa pa prome biaha. E seleccion di damas di Aruba ta conta cu un total di 20 futbolista. E seleccion lo hunga dos wega di clasificacion.
E seleccion di damas hunto cu miembronan di e staff tecnico, team manager, kit manager, y media officer lo ta biahando pa e prome wega cu lo tuma luga na Belize, dia 21 di september. Despues nan lo ta biahando pa e di dos wega cu lo tuma luga na Turks and Caicos dia 25 di september.
Un total di 34 ekipo nacional lo ta competiendo den e torneo aki y ta dividi den tres diferente liga, segun nan ranking. Aruba lo ta competiendo den e Liga C cu ta dividi den cuater diferente grupo. Aruba ta den grupo A hunto cu Belize, Turks and Caicos y Boneiro.
Despues di un total di 88 wega di e fase di grupo, incluyendo e weganan na cas y pafo di cas di cada liga y grupo, e prome clasificadonan di cada grupo di Liga A (tres ekipo), lo cualifica pa e fase di gruponan di CONCACAF Women’s Gold Cup 2024.
Ademas e di dos clasificadonan di cada grupo di Liga A (tres ekipo) y e prome clasificadonan di cada grupo di Liga B (tres ekipo) lo avansa pa e weganan preliminar di e CONCACAF Women’s Gold Cup 2024.
