Parlamentario independiente, mr. dr. Ryçond Santos do Nascimento: Segun gobierno e comunidad LGBTQ+ mester proteccion contra ideanan religioso

Señora Evelyn Wever-Croes a lansa un maneho aña pasa na mei 2022 yama: “ARUBA NATIONAL GENDER POLICY”. E documento ta wordo presenta como un maneho pa cu derechonan di hende muhe. Sin embargo e documento ta enfoca riba proteccion di hende muhe y e comunidad LGBTQ+. Lesa specialmente paragraf 1.3, titula Socio-Cultural Gender Norms and Stereotypes, riba pagina 13. Segun gobierno e pensamento cu genero y sexualidad ta fiho y cu ta existi diferencia entre homber y muhe ta anticua y ta forma un peliger pa hende muhe y e comunidad LGBTQ+. P’esey gobierno ta haya cu e mester proteha e comunidad LGBTQ+ y combati e ideanan cu ta hancra den nos cultura y religion. Segun Wever-Croes ideanan anticua di sexualidad ta causa angustia, problema di salud mental, insiguridad fisico y hasta suicidio den e comunidad LGBTQ+.

Gobierno kier promove un identidad personal y sexualidad cu ta totalmente liber di diferencianan biologico entre homber y muhe. Obviamente gobierno ta alinea su mes cu e idea cu cada persona por scoge y cambia su mesun identidad manera le da la gana. E pensamento cu gobierno kier promove ta cu matrimonio entre un homber y un muhe no ta nada mas cu un herencia di masculinidad toxico y un patrimonio patriarcal-religioso.

Un problema fundamental cu e maneho aki ta cu pueblo no a vota pa introduccion di e ideologia aki. Es mas, e ideologia aki ta bay linea recta contra e vision catolico-cristian, mientras cu un grupo importante di nos comunidad ta kere den e vision religioso aki. E vision aki ta basa riba e doctrina cu Dios a crea hende na su imagen como homber y muhe. Segun e vision aki homber y muhe ta forma un union intimo cu Dios. Homber y muhe ta completa y complementa otro pa medio di nan diferencianan, respetando e dignidad di otro. Nan ta forma e sociedad natural cu ta produci bida nobo. Asina ta surgi un relacion nobo y unico di amor entre mayornan y nan yiunan. Den cuadro di e relacion aki mayornan tin e derecho y obligacion pa educa nan yiunan. Gobierno no tin derecho pa kita e responsabilidad aki. Na su turno yiunan tin derecho di crece den un famia, cu un tata y un mama cu ta crea un ambiente na unda e yiunan por desaroya nan identidad y madura pa motibo di un relacion familiar cu masculinidad y feminidad di un tata y un mama. Ta den e famia aki e yiu ta wordo educa pa reconoce e balor y e beyesa di e diferencia sexual, di igualdad y di intercambio a base di respet. E derechonan aki ta bay man den man cu derechonan fundamental manera e libertad di pensamento, consciencia y religion.

Awe señora Evelyn Wever-Croes a encarga e “ARUBA NATIONAL GENDER POLICY” den man di Geoffrey Wever pa ehecuta e maneho aki. Geoffrey mester bay inventarisa con discriminacion di e grupo LGBTQIA+ ta tuma luga. Tambe e mester percura pa “educa” pueblo y nos yiunan encuanto e ideologia LGBTQIA+. Pueblo no a vota pa esaki y ta pueblo so tin e autoridad pa duna gobierno un mandato pa bay persigui catolico-cristian den e pais aki, pa motibo cu nan ta kere den e masculinidad y feminidad di un tata y un mama.

Nos ta dilanti un situacion na unda Iglesia Catolico, iglesianan protestant y iglesianan evangelico a mustra caba unda nan ta para. Casi 20 mil ciudadano a duna nan firma pa sostene famia y matrimonio tradicional. Awo yabi politico ta den man di un par di parlamentarionan cu ta yama nan mes cristian. Como miembronan di coalicion nan ta den e posicion unico pa forsa cambio. P’esey e responsabilidad ta riba nan schouder pa demostra nan compromiso cu principionan. Ta ora pa Hendrik Tevreden y Marco Berlis mira señora Evelyn Wever-Croes den su wowo y exigi cu tur frankesa y curashi pa e retira tur elemento anti-catolico y anti-famia for di su maneho “ARUBA NATIONAL GENDER POLICY” y for di presupuesto 2024.