Cu e obhetivo di reconoce esnan cu tin talento, creatividad y cu comunidad mes ta stima, respeta, aprecia, apoya y balora, e aña aki Go Cultura Foundation ta celebrando e di tres aniversario di Premio Nacional di Oro y nan ta buscando esnan cu ta bay tin e honor di haya e reconocemento aki cu tres categoria nobo.

Na aña 2021 Jossy Brokke Jr. tabata e prome artista cu a haya un homenahe y e premio nacional aki pa su excelencia artistico y pa 65 aña di aporte na desaroyo cultural di Aruba. Por corda cu e prome homenahe dedica na Jossy Brokke eaña ey, caminda cu Fundacion Go Cultura a sorprende Jossy cu e premio aki y a nombra Jossy Brokke como Aruba su prome recipiente di Premio Crioyo di Oro.

Na 2022, despues di un luna largo cu comunidad general por a nomina nan faboritonan, a toca turno na Maybelline Arends-Croes pa ricibi e premio nacional aki, ken a ser considera como un di e artistanan y baluartenan cultural di mas importante, emblematico y legendario di henter nos historia como isla y como pais.

Na su 78 aña di edad, por mira atras riba un carera y trayectoria impresionante di Maybelline como docente, compositor, musico, productor, cantante y ciudadano Arubano activo, ehemplar y productivo. E homenahe di gala cu Maybelline a ricibi tabata dia 30 di november di aña pasa, cu a inclui un concierto musical cu oranan carga pa un elenco impresionante di e streanan di mas briyante di e mundo musical di e pais, cu na mes momento ta amigonan y alumnonan di semper di Maybelline. El a bira un biahe den Maybelline su carera musical desde su inicio te cu actualidad.

Despues di e exito grandi aki, Fundacion Go Cultura a dicidi cu lo continua cu e proyecto aki, considerando cuanto baluarte e isla tin cu merece un reconocemento y homenahe di e forma aki, y tanten cu nan ta na bida.

Premio nacional “Crioyo di Oro” ta un premio cu a nace na 2021 crea y presenta pa Fundacion Go Cultura como estimulo y homenahe na baluartenan local cu ta forma parti di industria di arte di tarima (performing arts: cantante, musico, actor, poeta, cineasta, promotor y mas), cu a impacta nos comunidad di un forma impresionante y cu a dedica nan bida largo na desaroyo positivo y adelanto cultural di Aruba.

E aña aki Fundacion Go Cultura a anuncia un bes mas cu publico general por participa den e proceso di nominacion pa e proximo persona, personanan of grupo(nan) cu lo ricibi e premio aki.

Durante e prome dia cu e plataforma di nominacion a bira publico, por a nota un record di 338 nominacion cu a drenta. Pues por a nota un reaccion instantaneo hopi grandi for di nos comunidad cu a nomina varios persona cu nan ta desea di mira ricibi e premio prestigioso aki.

Pa un persona por considera pa ricibi e premio principal door di e comision di Fundacion Go Cultura tin varios rekisito cu e persona mester cumpli cune. Entre otro, e persona mester ta na bida, e mester a dedica su bida largo y di un forma excepcional y bisto na e adelanto cultural di Aruba, e mester por gosa di un bon reputacion den comunidad y su aporte por demostra hopi cla con el a hisa e perfil di e Industrianan Cultural y Creativo di Aruba, impactando desaroyo cultural, social y hasta economico.

E aña aki, a introduci 3 categoria nobo: Premio Estimulo, Premio Contribuidor di Excelencia y Homenahe Postumo. Den e pagina di nominacion, por lesa tur detaye di e categorianan nobo aki.

Den luna di october proximo lo anuncia nomber di e ganadornan di e premio aki pa 2023. Esaki lo habri caminda tambe pa e celebracion y homenahe di gala cu lo tuma luga dia 1 di december 2023. Publico por asisti na esaki, manera cu tabata e caso e prome dos añanan.

E premio mes, ta un diseño di Fundacion Go Cultura y un produccion di artista Gilbert Senchi. E tin un simbolismo hopi particular cune di exito, desafio, fracaso, perseverancia, consistencia, superacion y excelencia. Abo tambe por nomina bo baluarte cultural faborito y bo por nomina mas cu un persona. Pa haci esey, por scan e QR-code riba Facebook fage di Go Cultura Foundation pa haya acceso na e pagina digital y click riba e link pa bo haci bo nominacion.