Mediante un comunicado di prensa, diasabra ultimo Cuerpo di Polis a informa cu Unit Narcotica ta continua combatiendo criminalidad riba nos isla na unda cu den un investigacion nan a haya un cantidad grandi di droga, di placa y a demas nan a detene dos persona relaciona cu esaki.
Diabierna for di den oranan di marduga Unit Narcotica ta riba pia en conexion cu un otro investigacion grandi. Ta trata di un investigacion unda cu delincuentenan a kere cu nan por trece droga Aruba, bende esaki y burla di nos Husticia pero aki ta unda cu nan a faya.
For di oranan di merdia a haci un entrada hudicial na un cas na Caya Soeur Nicephora y bao ordo di fiscal a detene e homber N.J.R.M di 24 aña di edad naci na Aruba.
E investigacion a continua y den oranan di anochi a haci un otro entrada hudicial na un cas na Bubali na unda a detene e homber M.P.T.T di 26 aña di edad naci na Aruba.
Durante di e entrada hudicial na Bubali a bin topa un cantidad grandi di droga y placa cu a keda confisca pa mas investigacion. No ta descarta cu lo tin mas detencion.
Unit Narcotica ta un unidad di Cuerpo Policial Aruba cu oficialmente a wordo lanta 1 augustus 2023. E unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu wordo intercepta pa Douane, US Customs na aeropuerto, door di ambtenaarnan di KIA y tambe tur droga encontra durante cualkier control policial.
Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, p’esey nan ta pidi pa si algun persona tin cualkier informacion, por yama nan na tiplijn di Polis cu ta 11141. Nan ta garantisa cu ta keda anonimo.
