(Infobae) – Cocaina casi ta bay bira e producto principal di exportacion di Colombia, superando e petroleo, ya cu produccion di e droga aki ta sigui aumenta mientras gobierno ta adopta un politica mas “comprensivo” pa loke ta trata droga, segun calculonan di Bloomerg Economics.
Exportacion di petroleo a registra un caida di 30% den e prome semester y e tendencia di comercio di cocaina a aumenta di forma permanente, loke ta nifica cu esaki ultimo por bira e producto principal di exportacion di Colombia e mesun aña aki, segun economista di Bloomerg Felipe Hernandez.
“Nos ta calcula cu ingreso pa exportacion di cocaina aumenta na 18.200 miyon dollar na 2022, no hopi leu di exportacion di petroleo pa 19.100 miyon peso di aña pasa,” Hernandez a sigura tambe cu “Gobierno ta destruyendo laboratorionan na unda blachi di coca ta transforma den cocaina, pero esey no a impedi cu e produccion a crece.”
Na 2022, e produccion di cocaina na Colombia a aumenta na un record di 1.738 ton, mientras cu e superficie di tera sembra cu coca, e materia prima pa fabrica e droga, compara cu 2021 a aumenta 13% yegando na 230.000 hectar, segun un rapport di Oficina di Nacionnan Uni Contra Droga y Delito publica e segundo siman di september.
E presidente Gustavo Petro, e prome gobernante Colombiano di iskierda, a cambia e perspectiva di e pais pa loke ta trata narcotrafico purbando di enfoca den e caponan di droga cu ta haya mas beneficio di e benta di e droga aki na stranhero na luga di bay contra e productornan di blachi di coca, cu ta e stap di mas debil den e cadena di produccion. Petro ta busca dialoga cu e gruponan principal di narcotraficante na e pais, cu speransa di pone fin na seis decada di conflicto civil mediante acuerdonan di paz.
