Ayera tardi ariba nan pagina oficial di Facebook, DOW a anuncia un otro proyecto cu lo tuma luga den e area di Palm Beach. Un otro proyecto mientras cu ainda tin otro proyectonan cu tin hopi tempo andando, pero no tin un fecha pa finalisa esaki nan.
Segun e publicacion e proyecto Upgrade di High Rise ta un proyecto cu ta parti den tres parti.
E prome parti lo ta e reconstruccion di e caminda entre Riu Antilla y South Beach. Tambe lo pone drenahe nobo y ductonan di awa preto nobo bou caminda.
E di dos parti ta mesun tipo di trabounan cu ta wordo realisa den e prome parti, pero esaki lo ta entre South Beach y e hotel Holiday Inn. E di tres parti ta encera reconstruccion di e wandelpad y trottoir entre Riu Antilla te cu Holiday Inn.
DOW a informa cu inicialmente e plan tabata pa tene destaho publico e aña aki y cuminsa e aña aki ainda cu e trabaonan di e prome parti y caba cu esaki pa final di aña aki ainda. Pero nan a agrega cu esaki por wordo logra solamente si no bin retraso den e proyecto pa motibo di awasero of materialnan cu lo mester bestel di afo.
Nan a splica cu teniendo na cuenta na unda e trabaonan mester tuma lugar, esta e area di High Rise, materialnan cu mester bin di afo y probablemente retraso pa motibo di awasero, nan a tuma e decision di tene destaho y otorga e trabou e aña aki ainda, pero trabaonan pa e proyecto lo cuminsa otro aña despues di temporada di cuaresma.
Esaki, segun nan ta India, lo duna e contratista cu ta bay ehecuta e trabaonan, suficiente tempo pa haci bestelling di materialnan necesario di afo pa evita cu esaki por ta causante di retraso di e proyecto. Destaho publico pa e proyecto lo tuma luga dia 27 di october.
Mester remarca cu ainda e trabaonan di construccion dilanti di e Citgo na Palm Beach ta bay haci aña y ainda no ta termina, pero DOW ta anuncia caba otro proyecto nobo sin duna claridad riba e trabaonan aki cu keto bay ta desvia trafico.
