Fundacionnan cu ta bringa contra cancer a anuncia proyecto “Nos t’ey pa bo”

Ayera mainta durante un conferencia di prensa, cuater fundacion cu ta bringa contra cancer aki na Aruba a anuncia nan union pa yega den e barionan di Aruba cu nan proyecto “Nos t’ey pa bo”, un proyecto pa trece informacion y conscientisa comunidad ariba e importancia di prevencion di salud.

Diantha Nuesch di Stichting BOB a anuncia e concepto nobo aki cu e fundacionnan a bin cune cual ta consisti di un serie di cinco charla informativo pa asina conscientisa pueblo di Aruba tocante salud en general y prevencion.

E cinco charlanan aki ta wordo organisa door di cuater fundacion cu a uni pa e mesun causa, e causa di prevencion y conscientisacion. E fundacionnan Wilhelmina Kankerfonds, Fundacion Contra Cancer di Prostaat (FCCP), Mary Joan Foundation y Stichting BOB Aruba. “Nos ta uni atrobe pa demostra cu nos ta para hunto y cu nos tey pa pueblo di Aruba,” Nuesch a remarca.

E prome charla lo tuma luga dia 20 di september den bario di San Nicolas na Centro Santa Teresita, lo continua cu e siguiente charla riba dia 18 di october den bario di Santa Cruz na MFA Santa Cruz y dia 22 di november e charla lo tuma luga na MFA Paradera. Siguiente aña den luna di februari lo continua na MFA Noord y 20 di maart e fundacionnan lo ta den bario di Dakota.

El a splica cu cada charla ta den un otro bario pa asina nan por yega mas cerca di e personanan. Charlanan ta cuminsa 7or, pero porta na ta habri for di 6:30 caba y entrada ta gratis.

Nuesch a resalta cu e concepto di e proyecto aki ta un concepto nobo caminda cu nan kier yega mas cerca den cada bario y asina motiva y facilita e proceso cu tur hende por yega na e charlanan pa haya e informacion tocante e servicionan cu e fundacionnan ta brinda, ken e fundacionnan ta y kico nan ta para pe. “Nos kier duna pueblo e hermentnan, e informacion pa nan por actua riba dje na cas.”

El a subraya tambe cu ta hopi importante pa hobennan asisti na e charlanan informativo aki pa nan tambe ta consciente di e salud di nan curpa, salud en general y tambe e rol cu nan por tin den prevencion. El a enfatisa cu prevencion ta cuminsa desde un edad hopi jong, a pesar cu na un edad asina hoben no por participa ainda na Stichting BOB, pero si nan ta siña conoce, den caso di e damanan, nan pecho y asina por motiva otro cu si por participa.

Nuesch a remarca cu e fundacionnan a tuma e iniciativa aki di bay te den e barionan pasobra nan a ripara cu tin difernete bario cu ta menos activo cu nan participacion. “Mi ta echt urgi tur hende pa no warda te ora bo haya un invitacion pa cualkier chekeo di salud. Bo mes tuma accion traha bo cita y participa preventivamente pasobra esaki ta caminda bo mes por yuda salba bo bida,” el a destaca.

Sr. Milo Croes, presidente di Fundacion Contra Cancer di Prostaat (FCCP) a reslata cu e fundacion tin un tarea di informa hende homber cu nan mester tuma accion, pa nan sinti y scucha nan curpa y tin bon conocmento di kico ta cancer di prostaat.

“Nos meta ta pa yuda pa e hende homber tuma decision prome cu nan sinti algo robes, cu algo no ta bon, bishita bo dokter di cas asina bo tin 40 aña, si tin hende den famia cu tin cancer di prostaat,” el a remarca.

Croes a indica cu e edad di cancer di prostaat a cuminsa baha. Den e ultimo añanan hendenan mas hoben ta presenta cu cancer di prostaat. Segun el a conta, durante un combersacion cu su urologo, esaki a splik’e cu aworaki no tin un edad specifico pa cancer di prostaat. Anteriormente tabata bisa cu na 60 aña un hende homber por haya cancer di prostaat, pero aworaki e edad a baha, locual ta alarmante.

“Mas trempan bo check, mas trempan bo controla, mas trempan bo busca ayudo, e chance di haya un cancer maligno ta minimo,” Croes a enfatisa.

El a subraya cu e realidad ta cu hende homber ta cobarde y miedo mas grandi, segun e ta indica, ta ora cu nan tin cu bay dokter y dokter ta bisa cu e parti di sexualidad no ta funciona mas. “Esey ta e miedo mas grandi cu hende homber tin. E resto, si nan muri mes nan no ta worry.”

Croes a agrega cu otro banda ta cu tin hopi hende grandi riba 60 aña, cu no ta bay check, y si nan check y nan haya sa cu nan tin cancer, nan no kier tuma tratamento, nan ta nenga.

Segun informacion cu el a ricibi for di su dokter, na Aruba tin 800 caso di cancer di prostaat, cual ta mas caso cu na Hulanda, Merca y Colombia, basa riba e cantidad di habitantenan cu tin na Aruba.

El a splica cu den pasado e directiva di e fundacion tabata usa un enfoke diferente na unda nan tabata bay na diferente compania y organisacion cu tabata pidi charla, pero e efecto cu e tabatin personalmente e no ta mire pasobra toch e hende homber ta keda scondi.

“P’esey nos a dicidi pa haci un team cu hunto nos ta bringa cancer. Uno, nos ta yega na mas hende, dos, e ta sali mas economico pa organisa algo y tres, e ta duna nos mas fortalesa, mas confiansa cu locual nos ta haciendo ta bon pa comunidad. Nos ta bisa como hende homber, wak bo no ta laat y nos ta bisa bo nos ta crusa e brug hunto, bo no ta bo so,” Croes a enfatisa.