AHATA y DPL ta uni cu un campaña di conscientisacion pa esnan cu ta buscando trabou

Durante un conferencia di prensa di ayera, AHATA conhuntamente cu DPL a duna di conoce e campaña di conscientisacion y un plataforma digital cu e obhetivo di brinda apoyo na comunidad cu consehonan riba e proceso di solicitud y entrevista pa trabou, pa asina pone enfasis riba areanan cu tin mester di mas atencion den e sector aki.

Den dialogo cu AHATA su miembronan, por conclui cu frecuentemente, falta di preparacion ta resalta durante e proceso di aplicacion y entrevista, ademas scarsedad di trahadonan den sector hotelero ta un topico cu ta keda frecuente.

Pa mehora e chens pa un aplicante haya trabou den sector di hospitalidad y turismo, AHATA a desaroya un plataforma digital crea pa asisti tur persona cu ta interesa den e sector aki, cu consehonan riba con pa aplica pa un trabou na un manera mas eficiente, con pa traha un CV, preparacion pa entrevista, con pa bisti pa un entrevista, y tambe considerando varios otro aspectonan importante durante e proceso di aplicacion. Tur persona cu tin interes den labora den sector di turismo y hospitalidad por tuma contacto cu AHATA pa haya mas informacion di esaki.

LaSorte ta indica di ta consciente cu e preparacion pa solicitud y entrevista di trabou no ta facil. E plataforma aki ta brinda sosten, conseho y ta mehora e chens pa un persona por haya un trabou.

Forsa Laboral

Den November di 2022, Directie Arbeid en Onderzoek (DAO) hunto cu Centraal Bureau voor de Statistiek (CBS) y Centrale Bank van Aruba (CBA) a ehecuta e Encuesta Forsa Laboral. E encuesta aki ta tuma luga anualmente, y ta tambe conoci como e Labor Force Survey (LFS). E obhetivo principal di e LFS ta pa obtene un bista completo y actual di e mercado laboral di Aruba. Por medio di acumulacion di datos, e encuesta por determina cifranan cardinal di un pais, manera e grado di empleo y desempleo, y tambe pa señala e otro tendencia cu tin riba e mercado. E informacion aki ta uno esencial pa e desaroyo di maneho pa cu e mercado laboral.

E datos colecta durante november di 2022 a determina un aumento di 4.1% di persona emplea compara cu aña 2021. E proporcion di persona emplea relativo cu e populacion di 15 aña bay ariba ta 58.1%. E cantidad di esnan emplea na november 2022 tabata 52.053 persona.

E cantidad di persona desemplea a conoce un reduccion di 4.5% en comparacion cu e aña 2021. E grado di desempleo na november 2022 tabata 4.3%. Esaki ta un hecho remarcabel, como cu den e ultimo dos decada Aruba no a yega di conoce un grado di desempleo bou di 5%.

E grado di desempleo di hende muhe a baha di 9.7% na 2021 pa 5.3% den november 2022, mientras cu e grado di desempleo pa homber a baha di 7.9% pa 3.2% den e mesun periodo aki.

E grado di desempleo pa hoben di entre 15 pa 24 aña a baha for di 19.1% den aña 2021 pa 9.9% den november di 2022.

Ta importante pa menciona cu e cifranan aki ta refleha con e mercado laboral na Aruba ta actualmente mirando cu hospitalidad y turismo ta sigui keda forma parti di e pilar economico sirbiendo na e bishitantenan cu ta bin door di e producto cu Aruba ta ofrece.