(NLTimes)—Gobierno no mester provee hende muhe cu anticoncepcion hormonal gratis, segun e Corte di Apelacion na Den Haag a bisa diamars. E decision tabata un apelacion riba un decision di un corte mas abao cu a rechasa un caso entrega pa cinco organisacionnan civil purbando di forsa e Estado Hulandes pa cubri e costonan di anticoncepcion pa hende muhe.

E organisacionnan aki a insisti pa anticoncepcion gratis pa tur hende muhe, posiblemente via un pakete di seguro di salud basico. Nan a cuminsa cu un accion legal, citando discriminacion indirecto, mirando cu hende muhenan principalmente ta carga e costonan financiero pa anticoncepcion manera pildo of spiraal. E organisacionnan a argumenta cu ta e deber di e Estado pa elimina e forma aki di discriminacion.

Na october 2021 caba, e Corte di Districto na Den Haag a rechasa e declaracion aki, y a dicidi cu esaki tabata den man di politiconan, no e cortenan, pa dicidi si gobierno mester cubri costonan di anticoncepcion. E cinco organisacionnan cu a entrega e caso ta inclui Stichting Clara Wichmann, Stichting DeGoedeZaal, Vereniging Nederlandse Vrouwen Raad, Stichting WOMEN Inc., y Vereniging Humanistisch Verbond. Despues nan a entrega un apelacion.

Diamars e corte mas halto a mantene e decision, bisando cu gobierno Hulandes no ta obliga pa ofrece compensacion. Segun e corte,e rapport uza pa e organisacionnan no a substancia e declaracion cu “hende muhe en particular ta carga e costonan di anticoncepcion.” Corte tambe a nota cu e Estado Hulandes no ta causa “ningun discriminacion indirecto.” Anteriormente, e corte a dicidi cu tratonan di derecho di humano no ta garantisa e derecho pa anticoncepcion gratis.

Gobierno Hulandes a kita e pildo anticonceptivo, locual ta e forma di anticoncepcion mas uza na Hulanda, for di e pakete di seguro basico na 2011, bisando cu no tabatin ningun necesidad medico pa esaki. Mucha muhenan bao di e edad di 18 ainda ta haya reembolso pa e pildo bao e seguro basico, y entre e edadnan di 18 pa 21, e costonan ta cubri for di e impuesto pa cuido medico. Pero hende muhe riba e edad di 21 aña mester paga pa e pildo nan mes.

E demandantenan tin tres luna pa apela e decision aki y pidi pa un procesamento dilanti Corte Supremo.