Recientemente, Bon Dia Aruba ta bin publicando informacion cu ta ricibi di fuentenan cu conocemento di e situacion andando na Dr. Horacio Oduber Hospital. E informacion ta indica cu ta existi un cultura di menasa y termento contra e profesionalnan medico, cu segun e fuentenan, ta motibo cu cantidad di specialista a busca retiro y hasta a bandona e isla, causando e escasez di personal cu ta limita e servicio cu HOH por brinda.
Mientras cu PR di HOH a bisa na Bon Dia Aruba cu “no tin ningun keho cu a ser entrega contra di Hunta di Directiva ni tampoco contra director di HOH mes,” informacion cu Bon Dia Aruba a ricibi di fuentenan interno di HOH ta mustra cu director di hospital, Jacco Vroegop, si ta na altura di e preocupacion di e profesionalnan di cuido medico.
Na momento cu algun profesional a expresa preocupacion pa cierto aspecto di e funcionamento di hospital, principalmente den area di ginecologia, e director a mustra un actitud non-chalant y no ta duna informacion ni siguransa na e profesionalnan. Por a compronde cu mayoria di hefe di departamento a expresa preocupacion pa e Departamento di Ginecologia.
Tambe e profesionalnan a expresa directamente nan preocupacion pa e retiro di nan coleganan profesional cu tur consecuencia cu esaki por trece pa cuido di salud na Aruba.
Tin hopi preocupacion pa e hecho cu tin falta di personal hopi grave, por ehemplo, cu ya tin cinco pa seis aña ta den situacion no optimal. Ta parce cu e cultura na hospital ta hunga un rol pakico solicitantenan no ta continua cu e proceso di contratacion, y alabes, ta bisa cu no por garantisa cu lo yega na resolve e problema di escasez di personal den futuro cercano.
Igualmente e profesionalnan ta keha cu ta introduci politica y protocol nobo den hospital sin cu esakinan ta conta cu sosten di e personal medico. Tambe e personal a expresa nan malcontento indicando cu e Hunta Directiva no ta receptivo na momento cu ta expresa nan preocupacion y critica, y tambe a indica cu tin un cultura di miedo na hospital. Segun a informa na Bon Dia Aruba, e preocupacionnan aki a keda presenta varios biaha na e Hunta Directiva y tambe e Hunta di Supervision.
Manera por recorda, e problemanan pa cu e actitud di director di HOH y e cultura di miedo y intimidacion na hospital a bin den luz publico na momento cu anestesiologo Dr. Ike Posner a comparti su pensamentonan riba Facebook despues di retiro di ginecologo Dr. Babet Latour. Posner a expresa critica pa e directiva di HOH bisando: “E hunta di supervision ta comparti responsabilidad pa mal maneho na hospital. Si nan no eherce supervision adecuado riba e hunta ehecutivo, nan tambe tin un rol den e mal maneho. Si esaki ta pa motibo di indiferencia of incompetencia ta depende riba e circunstancianan specifico di e decisionnan dentro di e organisacion. E hecho cu Aruba ta bin sufriendo cu cuido ginecologico y obstetrico inadecua pa un periodo significante ta inaceptable.” E ta reitera su opinion cu HOH “ta core cu ginecologonan.”
Despues di e publicacion di Dr. Posner, mas fuentenan interno di HOH a bin dilanti pa confirma e declaracionnan di Posner y agrega na esaki.
Manera Bon Dia Aruba a publica segun un fuente, “e testimonio recien di Dr. Posner y e publicacionnan anonimo ta duna un bista sin filter di e situacion precario dentro di HOH. No solamente dokternan ta confronta cu intimidacion personal y profesional di e Hunta Directiva, sino cu varios empleado cualifica ta haya nan mes obliga pa retira di un manera brutal.
“Otronan a bandona e organisacion boluntariamente pa motibo di e comportamento inapropiado aki. Ademas, tras di cortina, ta entregando varios demanda pa victimisa empleadonan, un tactica usa pa e Hunta Directiva pa forsa retiro inhusto di empleadonan critico cu ta mustra nan fayonan y maneho fracasa.” PR di HOH a bisa cu no por confirma cu a entrega e demandanan aki ya cu mester tene cuenta cu privacidad di e trahadornan y pues no por duna comentario riba casonan individual.
E conducta alarmante aki a conduci na un deterioro preocupante den e cuido disponible na hospital riba e isla. Un escasez di personal cualifica y motiva, instabilidad interno dentro di HOH, desgaste significativo di empleadonan hunto cu problemanan andando cu proyectonan di construccion y e costo halto di consultant externo, tur ta contribui na empeora e situacion. “E politica fracasa y maneho deficiente aki ta laga cla cu tin fayonan fundamental den varios aña, cu ta costa tanto e pashentnan como e poblacion di Aruba.”
Mientras tanto, minister di Salud, Dangui Oduber a indica na Bon Dia Aruba cu e tin confiansa cu e Hunta di Supervision lo ta manehando e situacion.
