Grupo Ta Basta, cu ta hopi activo riba rednan social pa loke ta trata casonan di abuso sexual di mucha, ta sigura cu tin mayornan cu tin miedo di haci denuncia pa motibo cu nan no tin un status legal riba e isla, locual ta perhudica e victima.
“Victimanan indocumenta no ta haci denuncia contra abuso sexual di mucha, di adulto y tampoco di problema domestico. Pasobra nan ta core e riesgo cu lo deporta nan y e abusador mes ta keda cana liber. Mester adapta e procedura aki cual polisnan ta man mara na dje, pasobra atrobe e victimanan ta sali perhudica y e abusador ta privilegia,” e grupo a indica.
Ta importante pa destaca cu ora un abuso, sea sexual of domestico, ta tuma luga, e victima mester acerca na e warda di polis mas cerca di cas pa asina por haci e denuncia formal, y no ta asina cu debi cu nan status riba isla no ta legal, ta nifica cu nan no por haci un denuncia y por deporta nan. Esaki ta trece como consecuencia cu e mucha menor di edad ta keda victima di abuso door di e abusador.
“Ta algo cu autoridadnan tin cu sinta y dialoga riba dje paso mester pensa riba e bienestar di e mucha y traha pa mehor’e. Asina nos haya un caso di un persona di misa cu nan yiu muhe menor di edad a wordo abusa door di e pastoor di e iglesia, y denuncia no a cay paso nan documentonan nota na ordo, nan ta indocumenta!!!!”
Den e caso aki, na ken autoridad ta defende? E victima of e abusador? Instancianan ta keda responsabel pa no cumpli cu nan trabou den casonan asina unda un mucha ta esun cu mas ta sufri debi cu su mayor nan papel no ta na ordo? Mester protege y cuida tur mucha cu ta inocente. Bon Dia Aruba ta bay sigui mas de cerca e topico aki den proximo dianan.
Nan ta señala cu tin hopi caso unda cu e mayornan no kier haci denuncia pa varios motibo manera door di berguensa, ken e persona ta, door cu e ta un familiar, door cu e ta paga e gastonan na cas, door cu nan ta haya menasa, door cu pa nan e nota algo grave y hasta tin biaha e mayor mes tambe ta victima di abuso unda cu e ta bira un circulo.
