(AP) — Presidente Ruso, Vladimit Putin a bisa ayera diamars cu e casonan criminal contra ex-presidente Mericano, Donald Trump ta vengansa politico cu ta mustra e corupcion fundamental na Merca.
“Pa loke ta e procesamento di Trump, pa nos loke ta pasando den condicionnan di awendia, den mi opinion ta bon pasobra e ta mustra con putri e sistema politico Mericano ta, cu no por pretende di siña otronan democracia,” Putin a bisa na e reunion di Foro Economico Oriental den ciudad Ruso den costa Pacifico, Vladivostok.
“Tur loke ta pasando cu Trump ta e persecucion di un rival politico pa rasonnan politico. Esey ta loke e ta. Y ta haciendo esaki dilanti publico di Merca y henter mundo,” el a bisa.
Encuestanan di opinion ta mustra cu Trump ta, pa un margen grandi, e contendiente mas fuerte pa bira e candidato di Partido Republicano pa eleccion presidencial di 2024. Durante su cuatro aña den Cas Blanco, Trump ripitidamente a gaba di tin bon relacion cu Putin, mientras criticonan tabata alega cu e tabata sumiso na e lider Ruso.
Trump a bisa cu e por resolve e conflicto na Ucrania den apenas algun dia si e haya e presidencia back. E no a duna detaye di su maneho potencial.
“Nos a tende cu Sr. Trump ta bisa cu e por resolve e problemanan urgente den algun dia, incluyendo e crisis Ucraniano. Well, esaki no por trece nada otro sino felicidad. Esaki ta bon,” Putin a bisa.
Sinembargo, e lider Ruso a bisa cu e relacion malo di su pais cu Merca probablemente lo no cambia significantemente sin importa ken bira presidente. “Kico pa spera di futuro, sin importa ken ta e presidente, ta dificil pa nos bisa pero no ta probable cu cosnan lo cambia radicalmente,” Putin a bisa. El a bisa cu administracion di Biden a crea un prehuicio fuerte contra Rusia y “lo ta hopi dificil pa nan di algun manera bolter henter e barco aki” den e otro direccion.
Rusia tambe ta programa pa un eleccion presidencial na 2024. Putin a evadi e pregunta ayera si e lo busca un otro termino despues di ta na poder, como presidente of prome minister, desde aña 2000. “Nos lo papia di esey” despues cu parlamento Ruso pone un fecha pa eleccion, el a bisa.
