Abuso y maltrato di cacho ta sigui tuma luga

Tabata dia 6 di september ora Luna Foundation Aruba a publica riba su rednan social un situacion basta lamentabel di un cacho cu sintomanan di abandono, na unda su situacion a bira mas complica debi na tur e carpata cu e tabatin tanto den su horeanan como den parti di su curpa.

E post aki a causa basta reaccion riba rednan social debi na e estado di salud di e cacho di nomber “Naya” na ken e fundacion aki mesora a hib’e cu un veterinario pa asina purba di mehora su situacion delicado di salud.

Te ayera, e fundacion a informa cu “nos mester di boso oracion y ayudo, Naya no ta bon, ta parce cu e tin un infeccion y esey ta debilitando e, e ta un luchado pero su curpa ta atak’e, dokter ta bay dun’e antibiotico cu speransa cu esey por sirbi di algo,” tabata e post na unda ta papia di Naya su situacion te ayera.

Pero esaki no ta e unico caso cu ta sucede den ultimo simannan na Aruba, dia 30 di augustus e fundacion cu ta encarga di rescata y cuida cachonan y otro bestianan bandona riba caya tambe a haya un otro cacho den area di Barcadera e cual Crioyo Trappers den colaboracion cu Luna Foundation a yuda e bestia aki cu ta sordo y ciego e cual supuestamente a ser bandona riba caya y tabata desorienta, den potretnan ta ilustra den ki condicionnan nan a haya “Mr. Magoo.”

Ademas, den un otro caso cu a tuma luga na San Nicolas tambe nan a haya un otro cacho cu tabatin doño pero tabata den un estado di salud critico unda su doño no tabatin e balor di pon’e drumi y e cacho tabata sufri debi na varios tumor cu e tabatin den su curpa, e veterinario no por haci mas nada p’e debi na su condicion y a pon’e drumi.

“Doñonan di cacho mester busca ayudo prome cu nan cacho bira di e forma aki, ban yuda nan pa no sufri mas,” Luna Foundation a señala riba su rednan social.

Luna Foundation Aruba ta un fundacion cu ta hopi activo den esaki, su fundado y presidente Zoey Conijn semper ta dispuesto pa yuda te na unda nan por pa loke ta trata cachonan cu ta sufri di maltrato y esnan cu ta den caya.

Despues cu nan a haci un expansion di nan santuario, e tereno pa acoge bestianan a bira mas grandi y e obhetivo di e expansion aki ta pa porfin nan por cuminsa cu e cas di retiro cu nan kier haci pa e cachonan bieu, y tambe un cura di hunga pa e puppynan pa separa e cachonan chikito for di esunnan bieu.

Conijn a remarca tambe cu nan tin un hospital ariba nan tereno. For di aña pasa e hospital tabata tey caba, pero e no tabata activo ainda. E hospital aki ta solamente pa e cachonan cu ta riba nan tereno.

“Ora algo ta pasa cu nan ta malo nos no tin cu bay veterinario pasobra nos tin nos hospital, djis nos no tin un veterinario, pero e veterinario ta bin cerca nos ora cu tin mester,” el a indica.

E tema di boluntario ta keda uno relevante pa e tipo di fundacionnan manera esaki unda hopi hende ta puntra pa un ayudo pero niun ta ofreciendo e ayudo cu tin mester pa loke ta trata boluntario.

Den mesun linea, Centro di Control di Cacho (CCC) tambe ta reporta casonan cu nan ta haya riba caya na unda nan ta enfatisa pa doñonan di cacho tuma e proceso di opera y usa microchip nan mascota den caso cu nan por perde y pa sterilisa nan tambe.

Den pasado, na luna di maart nan tambe a trece dilanti cierto situacion cu nan ta enfrenta como instancia: diariamente nan ta haya cacho bandona dilanti nan luga of casonan di maltrato severo unda mester pone e bestia drumi pa no sufri mas.

Mediante diferente publicacion haci riba red social Facebook, por a mira potret di cachonan bandona y un di nan cu tabata un caso hopi cruel di maltrato, cu a hala atencion di usuarionan. Nan a conta cu nan a ricibi un cacho cu cadena di hero pega den e cuero di su garganta. E cacho aki a wordo mara desde chikito y esaki a drenta den e cuero “y pa hopi tempo NINGUN hende, ni e doño a los e cadena.”

CCC cu colaboracion di Unit di KPA a bay back na e doño y a duna e persona aki un boet pa no a cumpli cu su responsabilidad como doño di e cacho aki.”

Lamentablemente, casonan asina tin hopi, pero esaki no ta hacie aceptabel. Ley ta existi y cu colaboracion di KPA, ta bay sigui reenforsa esaki pa asina comunidad di Aruba por cuminsa realisa cu abuso di animal no ta bay sin castigo.

Abandono y maltrato ta bay contra ley di cacho. Ta importante pa comunidad en general cuminsa actua den esaki, pa ta doñonan mas responsabel y cuida mascotanan cu tambe ta sinti y ta sufri.

E pregunta ta surgi, ta cuanto biaha mas mester sigui haya casonan di abuso di bestia di e magnitud aki? problemanan di cacho y pushi riba caya ta sigui keda un problema sin precedente y comunidad henter mester bira mas consciente di esaki.