Diahuebs den reunion publico tratando e topico refinanciamento di debe di likides, fraccion di AVP a presenta un mocion cu casi a manda gobierno cas. E mocion di desconfiansa contra Evelyn Wever-Croes y su gobierno a haya 10 voto na fabor y casi a haya un voto mas pa e por a ser aproba.

Durante e reunion aki e gobierno di mas malo cu pais Aruba por a conoce a bin diripiente Parlamento pa duna informacion encuanto deliberacionnan cu Hulanda encuanto refinanciamento di debe y e ley di Raft. Esaki mientras cu anterior tur decision a ser tuma sin dialogo cu Parlamento ni gremionan.

 

Prome minister sin consulta cu niun alma na Aruba a acepta desde mei 2020 tur condicion di Hulanda y a firma na diferente ocasion acuerdonan cu Hulanda, cu a mara nos pais na landspakketten, na leynan di Reino y un sin fin di medidanan cu (t)a afecta nos ciudadanonan directamente den cartera.

 

El a hinca nos ciudadanonan den pobresa grandi. Un cantidad grandi di ciudadano, despues di COVID no a haya oportunidad di recupera, paso mesora a tuma medidanan, a hisa BBO, hasta na frontera, haciendo costo di bida haltisimo. Tur prijs a subi drastico, tarifanan di awa y coriente a aumenta, hasta schoolgeld y prijs di uniform pa mucha a bay halto, sin lubida pago pa medicina na counter. Esaki mientras cu gobierno no ta baha su gastonan di goederen en diensten ni di autonan cu ta costa mas cu 150 mil florin, biahenan lucrativo y fabornan na e kliek di amigonan y famianan. Tur esaki sin transparencia y sin duna cuenta na Parlamento pa medio di e.o. jaarrekeningen.

P’esey Raad van Advies, CAft, ni gobierno Hulandes no ta confia mas den Evelyn y su gobierno.

Banda di esaki Evelyn Wever-Croes tin 2 cara. Na Hulanda e ta bay di acuerdo pa pasa un Rijkswet y na Aruba e ta haci comosifuera ainda esey ta den discusion.

Van Huffelen a declara na juli 2023 cu Hulanda lo ta dispuesto di refinancia debe di Aruba ta na mita di e porciento si acepta Rijkswet of Ley di Reino/ RAFT.

Evelyn su reaccion riba dje. “Nos a informa Hulanda cu Parlamento ta contra Ley di Raft”. Pakico e no ta bisa kico e mes a dicidi y bay di acuerdo cune?

Segun declaracion di Evelyn: “den corespondencia Hulanda ta indica cu no mester ta RAFt con tal cu e ta un Rijkswet”.

Den parlamento a bin hunga rol y haci comedia y a bin tira tur culpa riba AVP. AVP esaki, AVP esaya.

E Sra. aki ta cometiendo blunder tras di blunder y no kier carga su responsabilidad y ta tira culpa riba otro.

Awor cu el a entrega autonomia di nos pais, loke tanto su omo a lucha p.e., e ta bin Parlamento pa mañan e por tira culpa ta Parlamento a dicidi, no t’e. Otro ehempel di no carga responsabilidad. Mientrastanto cu ya el a entrega autonomia e minister di finanzas ta tira palabra y ta usa di palabranan manera p.e. derecho humano, responsabilidad y autonomia y hasta ta usa contenido di cancion di Bob Marley: “every man has his own destiny”. Awo cu baca a hoga e kier keda bon cu su pueblo pa nan no tilde di traicion. Pregunta ta unda minister di finanzas tabata tur e tempo ey?

Hulanda ya no tin confiansa den e gobierno aki pa laga gobierno pasa su propio ley local di supervision. Na aña 2019 Evelyn, mientras e tabata bisa Hulanda cu e prolonga e ley di LAft, cu su di dos cara el a hunga e wega di duna advies positivo riba un amienda cu Ady, Rocco, Endy, y otro parlamentarionan di MEP a presenta pa cambia e ley aki. Y awe por tuma nota den medio di comunicacion cu mesun Rocco cu tabata contra supervision nacional ta manda propuesta Hulanda pa ayudo pa drecha KIA segun landspakket, cu ta parti di e supervision di Hulanda. Bida sa dal buelta.

E ley di LAft a keda den lachi y nunca no a ser firma dor di Gobernador.

Van Huffelen ta indica den su carta cu Rijkswet ta e unico instrumento cu no por ser cambia facilmente dor di Aruba. Kiermen Hulanda su preocupacion ta e dos cara di Evelyn Wever Croes, su “wispelturigheid” y “onbetrouwbaarheid”, esta cu si e palabra un algo e ta bin Aruba y cambia esaki, mientras si ta un Rijkswet e no por cambia nada. Ta P’esey mes ora Wyatt-Ras a hiba su discurso, Evelyn Wever-Croes a bay sconde den baño.

Pueblo ya no por mas. E gobierno aki dia pa dia ta masacra nos pueblo. Nos hendenan merece mihor. E gobierno aki mester bay cas, prome cu nan caba cu nos pueblo, p’esey un mocion di desconfiansa.