(EFE) – Diasabra ultimo Gobierno Colombiano a publica e politica nacional nobo di droga, cu ta busca cambia “e paradigma actual” di mas di mey siglo di un lucha failliet contra droga y asina enfoca esfuersonan di persigui narcotraficantenan grandi y apoya e campesinonan pa cana e caminda di economia legal.
Cu e nomber di “Sembrando vida expulsamos el narcotrafico” e programa di 83 pagina di un tempo di 10 aña (2023-2033) cu e firma di minister di Husticia, Nestor Ozuna ta haci un diagnostico di e situacion y ta numera e politicanan publico riba e tema pa crea e politica nacional.
Tabata di spera cu e mesun presidente Gustavo Petro tabata esun cu lo a anuncia esaki na Conferencia Latino Americano y di Caribe di Droga, pero e presidente a limita pa papia tocante “genocidio” cu e guera failliet contra droga a laga cu e impulso di Merca for di mas di mey siglo na Latino America.
Segun Gobierno Colombiano, e politica aki ta busca ripara algun di e dañonan pa specialmente kita esfuerso na e persecucion di e campesinonan cu ta cultiva e blachi di coca pa duna nan na e rednan criminal narcotraficante.
“Politica Nacional di Droga ta establece un strategia pa cu comunidadnan rural cu ta depende di economia ilicito liga na droga lo cana e caminda di manera progresivo y sostenibel cu economia legal, a traves di un proceso di cambio productivo,” e documento ta indica.
Tambe nan ta bay enfoca esfuersonan na atake contra narcotrafico “di manera enfatico” cu accionnan den cargamento di estupefaciente, hayando e structuranan di narcotrafico, persecucion di finanzas ilegal y labamento di activo of caracterisacion di organisacionnan criminal.
Na e momentonan aki, Colombia ta e pais cu mas hectarnan cultiva cu coca -230.000 segun calculonan di Gobierno- y esun cu mas ta produci cocaina -1.700 ton aña pasa so-.
Pero e ambicion di e plan aki cu ora e Gobierno di Gustavo Petro lo caba, lo “disminui produccion di cocaina cu un 40%, kiermen na 900 ton pa aña y e number di hectar cultiva lo disminui tambe na 40% cu ta 230.000 aproximadamente, pa 150.000 hectar cultiva.” Segun e minister a sigura.
