Mediante un publicacion riba nan pagina di Facebook, Turtuga Aruba Foundation ta haci un yamada na companianan operador di tour como tambe pa esnan cu tin nan boto pa respeta e areanan señala pa landa cerca di Malmok, specificamente na Tres Trapi.
Esaki debi cu un incidente cu un turtuga a tuma luga diaranson ultimo, na unda na Tres Trapi un turtuga hoben a ser haya morto na fondo di lama cu su caret kibra, loke ta indica cu e chapaleta di un boto por ta e causa su morto.
“Niun hende kier un accidente manera esaki, e riesgonan por disminui considerablemente creando un zona amplio pa esnan cu ta diving y pa e turtuganan. Botonan mester respeta e zona pa landa y pafo di dje nan por vigila bon, reduci velocidad y utilisa un protector di chapaleta.”
Di mesun manera nan a señala cu nan ta spera cu autoridadnan por coopera pa logra regulacionnan mas sigur cu lo por beneficia esnan cu ta diving of ta haci snorkel y tambe e turtuganan marino.
Yamada na instancianan concerni
E situacion aki keto bay ta causando molestia pa basta tempo caba. Pa e motibo aki ta haci un yamada na autoridadnan concerni pa crea areanan unda botonan por core sin causa peliger y na velocidad rasonabel. Tin hende local como tambe turista cu ta gusta haci snorkel pa asina wak e bunitesa di nos lama, pero e botonan ta representa un peliger tanto pa personanan como pa e bida marino, den caso aki, e turtuga cu a muri di un manera hopi tristo.
Henter comunidad mester ta mas consciente e turtuganan no por hala rosea bao lama y esey ta e causa cu nan ta subi riba superficie. E choke cu botonan of jetsky ta un problema cu lo por bira pio na medida cu tempo ta pasa si no tuma medidanan, y den consecuencia lo por afecta e capacidad pa su alimentacion, migracion, y escape di bestianan depredador y asina tambe como su reproduccion.
