Turistanan a nota y a expresa preocupacion pa cantidad di sushi na lamanan di Aruba

Recientemente na nos mesa di redaccion a drenta reaccion di algun turista pa loke ta trata e cantidad di sushi cu tin rond di Aruba. E turistanan aki a vocifera nan preocpacion y tambe disgusto pa e mahos bista cu tur e sushedad aki ta crea pa Aruba.

Den su e-mail e turista ta conta cu el bishita Aruba recientemente y su caminata banda di lama no tabata placentero pa motibo di tur e sushi cu tabatin. Cos di hunga di lama kibra, kopi di plastic, straw, slof, baki di cuminda, napkin entre otro tabata algun di e sushi cu e turista aki a enkontra. “Mi a recoge loke cu mi por a carga durante mi caminata,” el a indica.

E bishitante a splica tambe cu e ta biba na Brooklyn, New York na unda ton un grupo di boluntario cu ta recoge sushi den e bisindario tur siman. A base di esaki el recomenda pa na Aruba tambe organisa un grupo di boluntario similar pa recoge e sushi cu tin, sobre todo canto di lama.

“E actividad por ta algo turistico tambe, ami a haciele mi so, of un manera pa localnan conecta cu otro hendenan den comunidad mientras ta haci un diferencia y mantene e lama di Aruba limpi,” el a remarca.

Otro turista cu den luna di juli tabata di vakantie na Aruba cu su famia tambe a expresa su preocupacion pa e cantidad di sushi cu el a enkontra.

“Un luga hopi bunita, bendiciona cu hopi naturalesa. Pero transforma gradualmente cu sushi di plastic,” e bishitante a enfatisa.

El a agrega algun potret cu el saca dia 2 di augustus patras di e Kapel di Alto Vista na unda por mira un cantidad impactante di sushi na e lama.

El a splica cu el a bishita mas di shete lama na Aruba y durante su estadia e tabata hopi facil pa mira diferente tipo di sushi na e lamanan.

Di otro banda el a remarca cu tabata hopi dificil pa localisa suficiente bari di sushi y barinan di reciclahe of ekiponan di gobierno cu ta haci limpiesa na e sitionan. El a señala tambe cu tabata hopi dificil pa localisa un punto di reciclahe.

Por ultimo el a indica cu despues di haci un investigacion, el a logra haya un luga cu ta haci reciclahe na e isla unda cu el a hiba tur e sushi di plastic cu el a recoge na final di su vakantie. “Porta e gobierno su punto di salida ta pa fortifica e partnership cu e localidad aki,” el a termina.