Miembro di Parlamento, Sra. Aquannette A. Gunn, ta haci un yamada urgente na Minister di Labor, Energia y Integracion, Sr. Glenbert Croes, pa contesta preguntanan critico tocante su maneho di energia pa Aruba.
E preguntanan, cu a keda dirigi na Minister Croes den forma di carta, ta busca claridad riba varios asunto clave, incluyendo e status di Environmental Studies di Eagle LNG, e trabounan di construccion pendiente, y e implicacionnan financiero di e MOU recien firma cu Acciona Energia.
Sra. Gunn ta pidi contesta por escrito y ta spera cu e Minister lo cumpli cu su debernan democratico y transparente pa informa tanto Parlamento como e pueblo di Aruba.
Preguntanan clave
- Eagle LNG: A finalisa e Environmental Studies? Y si e contesta ta si, por comparti e estudio cu Parlamento?
- Construccion Pendiente: Kico ta e motibo cu e trabounan di construccion pa e facilidadnan y tuberia no a inicia ainda?
- Tarifa di Coriente: Con e retraso den trabounan ta afecta e tarifa di coriente pa e pueblo?
- MOU cu Acciona Energia: Ki dia e MOU a keda firma berdaderamente y kico ta e implicacionnan financiero pa Pais Aruba?
Sra. Gunn ta subraya e importancia di transparencia y ta spera cu e Minister ta consciente di su postura di keda sin contesta ta crea un ambiente di desconfiansa y incertidumbre den e comunidad.
