(AP) – Trabao online ta creciendo globalmente, particularmente den e paisnan den desaroyo, creando un fuente importante di empleo pa muhenan y hendenan hoben den e paisnan di menos recurso unda trabao ta escaso, segun reportahe di World Bank publica diahuebs.
E reportahe aki ta calcula e cantidad di empleadonan online global na 435 miyon persona y ta bisa cu e demanda pa e trabao aki a aumenta cu 41 porciento entre 2016 y e prome kwartal di aña 2023. E aumento aki ta generando preocupacion entre e personanan cu ta boga pa derechonan di trahado a causa di e falta di proteccionnan laboral fuerte den e economia di trabaonan aki, unda persona ta traha trabao pa trabao cu tiki siguridad y tiki derechonan di empleo.
Mientras e trabaonan basa riba servicionan basa riba e localidad manera uber, Lyft y TaskRabbit ta rekeri trabao manera move y delivery, e trabaonan online ta mas tanto trabao for di cas. E tareanan ta inclui ingresa data, diseño di website, desaroyo di programanan etc. Pa muhenan den e paisnan den desaroyo “no tin suficiente oportunidad y hopi biaha nan ta encontra problema pa haya trabaonan di calidad halto a causa di responsabilidadnan na cas y otro factornan,” Namita Datta, autor di e reportahe a expresa.
El a bisa cu e trabaonan online aki ta provee e muhenan aki y hobennan cu un “oportunidad hopi interesante pa participa den e mercado di labor.” Alrededor di 90 porciento di paisnan di ingreso abao su forsa laboral ta den e sector informal, segun e reportahe aki. E gruponan aki cu ta boga pa e empleadonan ta enfatisa con precario e situacion ta den e area aki y e falta di siguridad di trabao, responsabilidad di maheo y otro proteccionnan social pa e empleadonan su salud y returo.
“E condicionnan economico den e paisnan den desaroyo ta diferente cu esunnan di Merca, pero loke ta universal ta e importancia di e desaroyo y prioridad di bon trabao, cu un minimum loon basico y un standard di labor basico,” Sharon Block, director ehecutivo di Harvard Law School’s Center for Labor and a Just Economy a declara. “Por tin diferente caminda y tempo pa yega aki, pero e ta un balor universal.”
E reportahe aki ta delinea con cobertura di seguro social ta abao entre e empleadonan aki globalmente. Mas o menos mita di e empleadonan cu a participa den e encuesta no tabatin un plan di retiro y mas o menos 73% di e empleadonan Venezolano y 75% di e empleadonan di Nigeria no tabatin placa cu nan a spaar pa retiro.
“Actualmente, tin demasiado trabao unda e empleadonan no ta den e clasificacion corecto,” Block a splica. “Cual ta nifica cu variso empleado no tin un garantia pa minimum loon, no tin un net di siguridad, no ta ricibi placa di desempleo ni tampoco compensacion di empleadonan. Awo algun estado a cuminsa traha pa trece dianan liber cu pago, pero si bo no ta biba den un di e estadonan aki, bo mester depende riba e hefe su bondad.”
