Minister di Energia Glenbert Croes: “Aruba mester ta prepara como pais pa e transicion pa Green Hydrogen”

Recientemente minister di Integracion, Labor y Energia, Glenbert Croes, a anuncia e Memorandum of Understanding (MoU) cu Utilities Aruba N.V, WEB, ELMAR, Refineria di Aruba (RdA) a firma cu Acciona Energia pa realisa e proyecto Green Hydrogen Aruba na unda minister Croes a splica un poco mas tocante e proyecto aki.

E proyecto di Eagle LNG y proyecto di Acciona Energia segun e mes a sigura ta bay co-existi cu otro na unda ta bay tin e posibilidad di tin nan dos disponibel pa economia di Aruba, pa e comunidad y tambe pa exportacion pa loke minister a sigura cu esaki ta bay ta un pilar economico no solamente pa consumo local sino tambe na nivel internacional.

Acciona Energia ta un compania cu tin mas di 45.892 empleado na mas di 40 pais den e 5 continente, cu un record di benta di mas di 11 miyon euro na aña 2022, ademas di esey nan ta conta cu mas di 100 aña di historia cu 50% di control familiar aproximadamente.

Cu 29 aña di experiencia cu parke eolico, molinonan di biento, hidroelectrico, termosolar fotovoltaico cu ta e parti solar y biomasa cu presencia global den e 5 continente y un cantidad di 11.826 MW total instala y 3.160 MW den construccion y comienso di construccion na 2023.

Minister Croes a sigura cu nan ta contento di por a scoge Acciona Energia pa e proyecto aki pa motibo cu nan ta e prome operador na mundo cu ta dedica exclusivamente na energia renovabel.

Ademas di esey, nan tin un focus multitecnologico cu un capacidad instala activo di 12 GW renovabel sin tin un historia cu fossiel fuel.

E introduccion di Aruba cu Acciona Energia a cuminsa na maart di e aña aki unda un delegacion di Gobierno di Aruba conhuntamente cu companianan estatal a bay bishita nan na Madrid, Spaña caminda nan a mira e planta di Green Hydrogen “Power to Green Hydrogen Mallorca” na Lloseta, Mallorca.

Gobierno a informa nan di e plan energetico nacional cual ta pa converti Aruba den un sila pionero den sostenibilidad y un interes den Green Hydrogen. Na mei ultimo Acciona Energia a bin Aruba pa conoce e sistema y na juli, recientemente a firma e MoU pa por desaroya e Green Hydrogen Valley na Aruba.

Mirando e diversidad di turismo na unda Aruba ta ricibi barconan crucero, cu e proyecto aki tambe por supply hydrogen na e barco crucero utilisando Hydrogen Fuel Cells pa Cold Ironing cu zero emision, e proceso aki ta proporciona energia electrico na un barco cu ta para na waf mientras cu su motornan ta paga y minister Croes a sigura cu e proyecto ta bay co-existi cu Eagle LNG, den esaki el a informa cu pa loke ta trata e barconan a manda nan un ordo pa MAERSK traha cuatro barco pa opera a base di gas natural y 48 barco cu ta haya gefuel door di metanol y e metanol aki mester ta produci cu green hydrogen.

“Ta bay tin un sistema economico unda gas natural y productonan como hydrogen of productonan deriva di green hydrogen ta loke mester bay usa pa fuel economia di futuro,” el a indica.

Pa e proceso aki Eagle LNG ta bay supply e barconan cu ta usa gas natural y tambe lo tin e green hydrogen pa e sistema di Cold Ironing menciona anteriormente. Cu e proyecto aki segun e minister mes a sigura, Aruba lo por bende green hydrogen na region y na Union Europeo na unda cu pa motibo di e guera entre Rusia cu Ucrania, Union Europeo a dicidi di reduci nan dependencia di fossil fuels for di Rusia y ta premira e consumo di por lo menos 50 biyon m³ di green hydrogen pa aña 2030.

Di e 50 biyon m³ aki, Union Europeo mes por produci domesticamente mas of menos 30% di nan demanda loke ta nifica cu 70% di nan demanda nan lo mester importa loke pa minister Croes ta un gran oportunidad pa Aruba si lo logra di ta un di e prome paisnan cu lo exporta pa Europa y e mesun region.

“E business model pa e Green Hydrogen Valley bira un pilar economico substancial a base di exportacion y tur loke nos lo usa localmente, e impacto ta bay ta increibel.” El a sigura.

Cu green hydrogen por produci ammonia y cu amoniac por produci fertilisante pa refrigeracion, industria di textil, industria farmaceutico y pa transporte, tambe por produci e-Methanol pa chemical feedstock, plastic, fuel, entre otro.

Aruba lo por bende e-Methanol pa barconan y den esaki e marca di barconan mas grandi na mundo menciona anteriormente MAERSK, tin un mision pa decarbonisa e transporte oceanico y ta bira e perspectiva pa clientenan grandi pa e uso aki na unda Aruba ta conoci mundialmente den mundo maritimo tanto pa barconan industrial, crucero y e wafnan cu ta ideal pa suministra e e-fuel aki pa nan manera minister Croes a bisa.

Tambe a expresa cu Aruba su Green Hydrogen lo por cumpli cu e normanan di Union Europeo y ta competitivo den costonan pa motibo cu un di e cost driver ta e costo di electricidad y mirando cu Aruba ta un di e paisnan top 5 na mundo pa genera electricidad a base di molina di biento por produci electricidad limpi y na un bon prijs.

Den e beneficionan di green hydrogen pa Aruba, tin empleo y experiencia local na unda minister Croes a splica cu un industria di green hydrogen lo trece oportunidad di empleo pa Arubianonan y lo yuda Aruba desaroya cu experiencia local y por exporta experticio pa otro paisnan cu kier desaroya nan industria.

Tambe por obtene entrada di exportacion di e green hydrogen, green ammonia, e-Methanol y otro combustibel sintetico traha cu green hydrogen.

Pa finalisa, minister Croes a señala cu “Aruba mester ta prepara como comunidad, como pais y como economia pa tambe haci e transicion aki”, pa motibo cu e green hydrogen lo ser produci na Aruba y ta propone pa den futuro e prome fase cuminsa na nivel local cu fuels cells den hotelnan y edificionan publico igualmente pa loke ta trata Cold Ironing.