Fundacion Alzheimer Aruba ta organisa simposio y ta anuncia proyectonan den conexion cu nan 20 aña como fundacion

Fundacion Alzheimer Aruba ta bay cumpli 20 aña y nan a tene un conferencia di prensa ayera na unda Marinus Wegereef lider di proyectonan di e fundacion conhuntamente cu Melva Croes-Yanez ken ta fungi como presidente y minister encarga cu Asuntonan di Adulto Mayor Ursell Arends a trece dilanti informacion tocante un simposio y varios proyecto.

Wegereef a splica cu luna di september ta e luna di conscientisacion di alzheimer na unda na Aruba casi 70% di e casonan di demencia ta di alzheimer y cifranan di Central Bureau of Statistics Aruba di Censo 2010 a bin dilanti cu pa aña 2030 ta bay tin tres biaha mas pashentnan cu alzheimer.

Nan a pidi Gobierno di Aruba, den caso aki minister Ursell Arends ken ta encarga cu Asuntonan di Adulto Mayor pa traha den conhunto y bin cu plannan na unda Wegereef a señala cu nan tin varios proyecto caba.

Un di nan ta e simposio cu e tema “Cuido cu Dignidad” cu nan ta organisando pa dia 23 di september cu ta bay tuma luga na Holiday Inn Hotel pa papia riba diferente tema como por ehemplo “Sundowner’s Syndrome” e cual ta e syndroom di bahada of subida di solo, na papiamento ta yamel’e “Wandromento” e cual ta trata di pashentnan cu ta sufri di alzheimer of otro transtorno neucognitivo cu tin e tendencia di sali for di cas hasta perde na unda algun di nan no por a ser localisa.

Na november di aña pasa a bira conoci e noticia di un adulto mayor ken tabata biba den districto di Noord y cu te ainda e ta desaparecido.

Nan di fundacion a bin cu un plan grandi pa haci algo pa e parti aki di wandromento y un di e otro proyectonan cu nan kier realisa ta un training pa esnan cu tin un ser keri na cas cu ta sufri di e sindrome aki e cual ta bay tin participacion di expertonan.

Otro proyecto cu tambe nan kier bin cune ta ‘M Alert’ e cual ta consisti cu ora un mucha ta perdi tin señalnan pa bay busk’e y nan kier bin cu esey na Aruba cu ora un persona ta perdi tur esnan cu ta getraind pa yuda manera Cuerpo di Polis di Aruba pa haci un buskeda grandi.

Den esaki, Wegereef a bisa cu Aruba ta un isla chikito y ta bon pa cuminsa haci e control social.

Ademas, el a sigura cu nan kier crea “E cunucu di demencia” na unda nan lo bay traha hunto cu Gobierno di Aruba pa nan por setup un cunucu di demencia pa esnan cu ta sufri di e syndroom aki pa nan por haya un bida digno, nan por biba den luga ey cu supermercado, pa bay corta cabey, pa haci huña, tur den un luga so y esey ta un di nan plan di mas grandi.

Den mesun linea di proyectonan, Wegereef a menciona cu nan lo haya un cacho cu ta bay yuda pa e buskeda di personanan desaparecido.

Presidente di e fundacion aki Melva Croes-Yanez a señala cu e tema principal di henter e celebracion aki cu tur aña tin un lema diferente, ta “Tur hende cu ta padece di un of otro condicion neurocognitivo ta un hende” esey tambe ta encera cu e fundacion aki ta para pa esey, “Cuido cu Dignidad” e cual ta nan meta.

Biniendo back riba e tema di perdemento unda e persona ta cana bay y perde riba e isla chikito aki ta di lamenta manera Croes-Yanez a sigura. Ta p’esey nan kier cu e training aki back cu a tuma luga hopi aña pasa na Aruba. “Nos kier duna e training aki na periodistanan, brandweer, hendenan di KP, Bureau Rampenbestrijding Aruba (BRA) esaki ta cosnan cu nos kier pa nos curason ta eynan pa motibo cu e hendenan aki tambe ta hende y nos mester trata nan diferente pasobra nan tin un of otro trastorno neurocognitivo, alzheimer of otro.” El a bisa.

Nan ta señala cu esaki ta importante pa educa e hendenan un tiki mas miho pa no tin bruhacion, debi cu tin basta duda riba e tereno aki, “hopi hende ta kere cu si un persona ta lubida bo tin alzheimer mientras cu no ta necesariamente y hasta tin chansa ta ser haci y p’esey nos mester bay re-educa nos comunidad.”

Loke nan como un fundacion cu tin 20 aña caba ta mira ta cu asina cu un persona ta diagnostica “e no ta sirbi mas” cu e persona mester ta aisla of ta keda bao curatela mientras cu nan ta keda hende y su malesa a ponel’e cambia na unda ta ataca e persona y no e malesa, manera Croes-Yanez a sigura. E parti di medica un persona pa e keda “mas trankil” esey tampoco ta un manera digno di un pashent cu e syndroom aki.

Pa loke ta trata e simposio di dia 23 di september, Melva Croes-Yanes ta bay ta presente hunto cu otro expertonan como Truddy Hassel di Cuerpo di Polis di Aruba, entre otro. Pa e simposio aki nan ta bay bende 100 carchi so.

Di su parti, minister Arends a menciona cu pa loke ta trata e 20 aña di existencia di e fundacion ta momento pa para keto riba esaki na unda cu dos decada pasa nan a tuma e iniciativa pa atende cu e necesidad aki cu tambe ta hancra e derecho di existencia di Fundacion Alzheimer Aruba den comunidad. Ta hopi probabel cu cada un di nos sea ta conoce un persona of tin un familiar cu ta sufri di alzheimer y mi ta kere esaki ta un malesa hopi dificil pa nos por lidia cune pasobra e ta atacha tambe e esencia di ken e persona ta, su experiencianan cu sernan stima y cu e creencianan cu a form’e como individuo, e memoria di su propio persona ta disolve cu un bay bin di biento,” el a indica.

El a invita comunidad en general y tambe profesionalnan na Aruba cu ta traha cu cuido pa atende e simposio aki pa por ta mas prepara y miho educa con pa atende e malesa aki un bes cu un ser keri ta padece di dje.

Minister Arends a informa cu su ministerio tambe ta traha cu Cas Marie cu tambe ta yuda cu adultonan cu ta sufri di alzheimer y e ta spera cu prome cu fin di e aña aki por tin dos cas mas tambe mirando cu e necesidad di comunidad ta aumentando y edad di personanan cu alzheimer tambe ta bahando “e ta un necesidad grandi den nos comunidad y nos ta bay traha di cerca cu Fundacion Alzheimer Aruba pa atende cu cada un di e retonan cu e personanan cu alzheimer tin pero tambe cu e retonan cu e famia di nan ta encontra.”

Minister Arends a señala pa redactor di Bon Dia Aruba cu nan tin retonan grandi den cuido pa Adulto Mayor adecua tanto na cas como tambe den centronan di cuido (particular). Durante añanan tabata tin hopi investigacionnan haci, cu hopi bon dato y sugerencianan. Locual tabata falta ta e compromiso pa atende cu esaki realmente y trece tur partner, stakeholder hunto pa hunto por atende cu cuido di adulto mayor.

“Enbehecimento di nos poblacion a ser anuncia y alarma a ser bati door di diferente instancianan y profesionalnan ya pa varios aña, mustrando nos riba e impacto cu esaki tin social economico como tambe riba cuido y otro aspectonan den nos comunidad manera vivienda, mobilidad y participacion activo.

Den e vision y maneho cu nos ta implementando hustamente ta atende cu tur e puntonan. Durante e Foro Nacional pa Adulto Mayor lo trece esakinan dilanti pa asina den dialogo nos por fiha nos metanan y vision na bienestar di nos Adultonan Mayor. Den mi pensamento casnan di cuido priva tambe ta forma parti di e “zorgkete”, gobierno su tarea den esaki ta pa tin maneho y control pa asina garantisa e cuido debidamente.” Minister Arends a finalisa.