Den e ultimo lunanan aki nos por a nota cu parlamentario Gerlien Croes a flip flop riba RAft y BTW respectivamente. Gerlien no ta duna pueblo ningun, pero ningun splicacion algun hustificando su cambio di posicion riba e leynan di RAft y BTW. Te cu Diamars 22 di Augustus niun hende, ni Parlamento, tabata sa cual lo tabata e opinion di sra. Croes riba RAft.

Gerlien den AVP tabata contra BTW y contra Raft

No ta un secreto cu ora sra.Croes tabata para firmemente tras di e punto di bista y opinion di e partido AVP riba e leynan di RAft y BTW. Nan lider Mike Eman no ta laga duda atras cu e ta contra di BTW y e RAft. Hunto cu su lider nan a sali numerosamente biaha pa cuestiona ambos ley, tildando entregamento di autonomia, y tildando con malo BTW ta pa pueblo. Ata awor diripiente Gerlien ta flip-flop bisa den prensa cu e ta pro-BTW!

Pakico Gerlien ta vocifera su flip-flop awo?

E pregunta grandi ta: Pakico sra.Croes a cambia su opinion y conviccion riba e dos leynan aki awo? Ki splicacion Gerlien por duna pueblo riba un cambio di opinion asina grandi riba dos leynan asina sensitivo? Dicon e no a vocifera su opinion antes ora e tabata ainda parti di e partido AVP cu e la “yama” pa corupto? Dicon ora e la sali di AVP e no a sali pa motibo di su opinion riba e RAft y BTW? Acaso loke e tabata vocifera den AVP tabata solamente loke Mike Eman tabata impone pa e papia? Acaso e no tabata tin bos y opinion propio den e partido? Esey sigur ta mustra e caso di Gerlien Croes. Acaso ora Sra. Croes ta papia di diseña, vocifera y lidera, ta instruccion di su lider Mike Eman e tabata papia, pasobra e no tabata mag di bisa nada di su mes? Kiermen awo cu Gerlien a bira independiente diripiente e tin un bos propio y ta p’esey el a cambia di opinion riba e dos temanan aki? Gerlien su lema nobo awor ta “Flip-Flop?” Kisas Sra. Croes ta buscando desesperadamente simpatia di comerciantenan y pueblo pa gana voto?

Gerlien kier e RAft pero ta flip-flop “live” den Parlamento

Durante di e reunion publico di diamars tratando e tema di e RAft, Sra. Croes a sali duro pa vocifera cu awor si e ta pro e RAft, loke ta un posicion contrario di ora e tabata den AVP. Sra. Croes a declara cu gobierno mester tuma e RAFT manera cu e ta, sin ningun argumento y defensa, pasobra pueblo no mester carga e consecuencia. Awor Gerlien ta grita pro e Raft, pero algun siman pasa den AVP e tabata contra RAft! Kiermen abo tabata contra pueblo segun bo mesun discursonan den Parlamento? Esaki nos ta yama e fenomeno nobo flip-flop, un politica barata sin diseño, sin un bos y sin liderazgo.

Nos tur por ta di acuerdo cu nos niun kier wak pueblo carga mas peso, y ta p’esey nos fraccion di MEP a menciona e diferente puntonan cu nos kier wak ancra den un LAft modifica. Puntonan procedente di un plan, strategia, amor pa nos pueblo pa cual nos ta luchando. Pero awor Sra. Croes tambe a bira entreguista a toda costa. Sin lucha pa husticia pa nos pueblo, pa nos bandera, nos autonomia, nos dignidad, y pa e posicion cu nos tin den e Reino actualmente cu ta duna nos e habilidad di por marca nos mesun rumbo. Sra. Croes ta completamente contra esaki y ta cla pa entrega Aruba na Hulanda. Sra. Croes ta uza diferente argumento cu ta zona manera su proximo partido ta Accion 21. Sinembargo, ora el a hay’e presiona politicamente despues di algun ora di debate den Parlamento Augustus 22 ultimo, el a core bisa cu e ta pro e RAft pero cu awor mester di algun cambio den e RAft. Ma bon, no ta esaki coalicion den Parlamento ta bringando p’e hopi tempo caba? Gerlien a dobla paso a yame bende patria? Gerlien su postura original den prome tanda tabata pa entrega Aruba manera e RAft ta. Naturalmente Gerlien no por a duna contenido cual te cambionan cu e kier mira, paso e no tin un plan. Un otro flip-flop mas, pasobra e realidad ta cu Gerlien a hay’e den cayente di debate y no tawata sa kico pa haci mas.