Mediante un conferencia di prensa di ayera, minister di Labor, Energia y Integracion Glenbert Croes a trece un update tocante e proyecto di Eagle LNG na unda el a informa cu e proyecto ta continuando cu tur permisonan necesario pa su realisacion.

Den esaki, minister Croes a splica cu nan mester a haya aprobacion di Ministerio di Defensa di Hulanda pa loke ta trata e cooperacion pa pasa e tubonan cerca of abou di Marinierskazerne na Savaneta e cual a ser aproba.

“Mi sa cu tin hendenan cu skeptico cu cosnan por ta tardando hopi y a mi lo duna un splicacion, ta prome biaha cu un proyecto di e indole aki ta ser realisa na Aruba y mi ta comprende cu tur hende por tuma un tiki mas tempo pa procesa, evalua y sigura cu e proyecto aki ta implementa di un forma exitoso, sigur y esey pa nos ta sumamente importante.” minister Croes a expresa.

Ademas, el a enfatisa cu introduccion di e proyecto di Eagle LNG pa suministra gas natural pa WEB Aruba N.V ta pa por laga e dependencia di heavy fuel oil cu lo yuda den stabilisa y reduci prijsnan di awa cu coriente door di introduccion di e proyecto di Eagle LNG lo yuda den esey y pa loke ta e supply di heavy fuel oil pa FMSA y despues su suministro pa WEB pa consumo y produccion di awa y coriente, tambe el a bisa cu nan ta purbando di yega na un solucion cu Petroecuador debi cu na e pais aki e situacion economico, politico y social ultimamente ta hopi complica.

“Pero nos ta keda comprometi na sigura cu nos pueblo lo por haya un tarifa di awa cu coriente cu nos cartera por carga, no solamente pa esey sino pa e suministro,” minister Croes a declara.

Bon Dia Aruba den su edicion di 15 di juni 2022 a publica un articulo na unda tabata indica cu na momento di a firma contract cu WEB, Sean Lalani di Eagle LNG a bisa cu ta bay usa e mesun ruta di tuberia cu tin awor aki entre e refineria y e planta di produccion di awa y coriente.

Sinembargo, e tuberia ta pasa den areanan residencial, for di Zeewijk te Balashi, cu ta inclui Marinierskazerne y areanan residencial na Savaneta y Pos Chikito. Comandante di Marinierskazerne a bisa Bon Dia Aruba cu e no tabata informa y cu un tubo di gas metano no ta bon idea pa pasa den un zona unda tin hopi ekipo explosivo.

Comandante di Marinierskazerne, Art van Beekhuizen a bisa Bon Dia Aruba na december 2021, cu tin hopi interogatorio riba con ta bay core e tubonan di gas di tereno di RDA pa WEB, ya cu awor nan pasa den areanan residencial y tambe den Marinierskazerne. Segun e Comandante e tempo ey, na momento cu yega asina leu cu ta determina cu ta usa e mesun trayecto, e lo kier sinta na mesa pa haya sa mas, y duna su punto di bista. “Marinierskazerne Savaneta tin explosivo,” el a comenta. “Como tal ta un luga special (een plek van bijzonderheid).”

Pero manera Comandante Van Beekhuizen a bisa e tempo ey, e tereno di Marinierskazerne tin su funcion militar y ta mantene reglanan estricto di maneho di procesonan. “E tubonan actual ta pasa cerca di e deposito di municion. Nos ta tira riba tereno, ta tene operacionnan cu helicopter. Mi interes ta pa ningun momento crea peliger sin cu mester,” Abma a bisa.

A informa Eagle LNG cu mester sa concretamente kico e compania kier y cua ta e medidanan pa garantisa siguridad. “E prome stap mester ta un rapport riba tipo di gas, tipo di tubo, cua ta e perfil di riesgo, cua elemento ta bay pasa, cua ta e presion. Den otro palabra e ‘specs’ (detayenan). Esey ta permiti cu por midi e riesgonan concretamente segun e analisis di riesgo. Nos ta warda ainda riba esey.”

Minister Croes a enfatisa cu na Aruba, DTI ta encarga cu e supervision pa siguridad y cu DNM ta envolvi pa percura cu ta tene naturalesa y medio ambiente na cuenta. En todo caso, ta atendiendo cu e preocupacionnan di Marinierskazerne y ta buscando solucion, Minister a bisa. “Di loke mi por compronde, e asunto di permisonan y ruta, tur esakinan DTI, DNM y DOW lo tene cuenta di tur factor.”

Eagle LNG lo paga pa e tuberia di RDA y WEB lo inverti den su tereno pa por ricibi e gas. Minister ta kere cu mester acelera e proyecto mirando e desaroyo den prijs di combustibel y su efecto riba tur prijs.

Igualmente a bira conoci e grupo di habitantenan cu ta contra e proyecto aki e cual nan a vocifera cu nan no ta contra e compania sino cu nan ta hopi preocupa pa nan hendenan, nan cas den caso cu e tubonan di gas sigui den e forma cu Eagle LNG kier haciel’e

“Nos ta un grupo di habitante preocupa di Balashi, Pos Chikito, Savaneta y Cura Cabay cu kier pa Eagle LNG / Gobierno reconoce y garantisa nos derecho di por biba trankilo, sin miedo pa nos siguridad y sin cu ta perde balor di nos propiedad. P’esey ta urgi Eagle LNG / Gobierno pa instala e tanki di LNG na Barcadera, pa limita risico pa nos barionan. Esaki basa riba investigacion di nos mesun expertonan.” Nan a sigura den un declaracion na october di 2022.

Plan di accion pa cortamento di coriente

Tambe el a informa cu debi na e continuo corte di coriente cu ta bin registrando den ultimo simannan, pa Gobierno di Aruba esey ta algo “totalmente inaceptabel” y pa e motibo ey nan a instrui na e director di Utilities Aruba N.V Anthony Rojer pa instrui un solo ekipo cu WEB, ELMAR y Utilities mes pa bin cu un plan di accion pa e proximo 30 dia pa motibo cu suministro di coriente mester ta corecto na e momentonan cu calor ta afectando hopi e comunidad di Aruba.

“Comunidad di Aruba ta paga un prijs di awa y coriente representabel pa asina nos haya un servicio di coriente y awa di calidad y e cortamento di coriente mester stop, mi ta pidi na director di Utilities pa liderisa e proceso pa den proximo 30 dia nos por haya un plan di accion pa esaki,” minister Croes a sigura.