Cifra di desempleo a baha te 4.3%

Asina a informa minister di Labor, Energia y Integracion Glenbert Croes den su conferencia di prensa di ayera mainta unda el a trece dilanti resultadonan di loke ta trata encuesta laboral denomina “Labor Force Survey” cu a ser haci na Aruba door di Directie Arbeid & Onderzoek (DAO), Central Bureau of Statistics Aruba (CBS) y Banco Central na 2022.

Encuesta ta indica cu a registra un aumento den e cantidad di personanan cu ta trahando, na 2021 tabata na 55.9% y na november di 2022 a yega na 58.1%.

Pa loke ta trata hende homber y hende muhe, hende homber activo laboralmente ta 62.6% y hende muhe ta 54.3%.

Pa prome biaha den dos decada cifra di desempleo a baha te na 4.3% manera minister Croes a sigura na unda cu na aña 2000 e desempleo tabata na 4.8% y a bin fluctuando den transcurso di añanan te cu el a yega na 11.4%.

Pa e participacion riba mercado laboral e cifra ta di 60.7%, e cantidad di hendenan cu ta inactivo riba mercado laboral ta di 35.156, den esaki minister Croes a sigura cu ta trata di studiantenan cu kier caba nan studio prome cu lo cuminsa traha, pensionadonan of hendenan cu no tin e interes pa subi riba mercado laboral.

“E ta un trend cu tambe ta bahando pero e ta un cifra cu mester di nos atencion, di defini maneho pa motiva hendenan pa bira activo riba nos mercado laboral, pasobra tanten lo tin desempleo, a pesar cu ta bahando, ainda tin un desempleo pa lo cual nos kier traha pa pone tur hende bay back na trabou,” el a sigura.

Den e cifranan di desempleo pa hobennan entre 15 pa 24 aña , minister Croes a señala cu na 2019 tabata di 16.0%, na 2020 a yega te 25.9%, na 2021 a baha te 19.1%, na juni di 2022 14.9% y na november ora e haci e encuesta aki a yega te 9.9%.

Neet Rate cu ta hobennan cu no ta empleado ni ta studia ta subiendo, na juni di 2022 tabata na 6.9% y na november di e mesun aña a yega te 7.4% , pa esaki minister Croes a declara cu ta un categoria cu mester di atencion, ta un categoria cu por ta vulnerabel.

Pa aña 2023, mediante un ultimo monitoreo haci na luna di juni ultimo minister Croes a expresa cu e trend positivo aki ta continua y esaki ta e resultado di e Labor Force Survey, di e recuperacion economico, laboral y recuperacion en general despues di pandemia di Covid-19.