Diadomingo 3 di september Fundacion Chico Harms a celebra Dia di Brazil cu nan gran Parada Cultural. Un parada yena cu ambiente folklorico y diferente gruponan cu a resalta e bunitesa di cultura di Aruba den diferente forma.
E aña aki e fundacion a celebra e dia 13 aniversario di Dia di Brazil cu tabatin como mensahe ‘Brasa bo Cultura’.
Celebracionnan di Dia di Brazil a cuminsa dia oficialmente 28 di mei cu e actividad di Parada Acustico, dia 29 di juli tabatin e Festival di Cantica di Caya, a sigui pa e evento di Batacaso Tipiox, despues a bin e coronacion di e reinanan cultural. Dia 1 di september tabatin e Parada di Lanterna, diasabra 2 di september tabatin e Festival di Tambu y e celebracionnan a culmina cu e gran Parada Cultural diadomingo 3 di september.
E aña aki e fundacion a introduci un actividad nobo den nan celebracionnan pa Dia di Brazil, cual a tuma luga dia 29 di october cual tabata e actividad di feria di cuminda multicultural. E meta di esaki tabata pa trece mas evento cultural pa Aruba y unda pueblo di Aruba por siña conoce y aprecia cultura di otro paisnan cu ta forma parti di e comunidad di Aruba.
E aña aki tabatin un total di 12 grupo cu a participa den e Parada Cultural cu a representa e cultura di Aruba di diferente forma. E aña aki tambe pa prome biaha grupo di scolnan a participa den e parada cultural pa asina e mucha- y hobennan yuda engrandece cultura di Aruba.
