(Infobae) – Estado di Chile tin cu paga 1.4 miyon dollar na 31 di e 33 minero cu a keda trapa 68 dia den e mina San Jose cu 720 meter di profundidad na aña 2010.
Corte Supremo a rechasa un recurso presenta pa Conseho di Defensa di Estado (CDE) un instancia encarga di cuida interesnan di estado Chileno, den esaki, e mineronan a reclama cu tabatin un falta di servicio di institucionnan estatal encarga cu e fiscalisacion di e minanan na e pais, Servicio Nacional di Geologia y Mineria (Sernageomin), Secretaria Regional ministerial di Salud y Direccion di Labor.
23 aña despues di e accidente y e rescate cu henter mundo a wak’e, cada minero cu a demanda estado Chileno ta bay ricibi cerca di 46 mil dollar cu di algun of otro forma, nan ta espera di por yuda cera e capitulo aki cu a cambia nan bida pa semper.
Ta menciona e caso di Omar Reygadas, cu hunto cu e ex-futbolista Franklin Lobos, cu tambe a keda trapa den e mina San Jose, awe nan ta traha den un compania cu ta dedica na huurmento di autonan.
Jose Ojeda, e homber cu a skirbi e mensahe “Estamos bien en el refugio los 33,” e mensahe cu a revela cu despues di 13 dia di e accidente cu nan tabata cu bida ainda, el a bisa cu awor ta sufri di diabetes, problemanan di curason y alzheimer.
Raul Bustos y Juan Ilanes ta e dos minero cu no a uni na e demanda aki, Ilanes a splica cu den su opinion ta e doñonan di e mina esnan cu tin cu indemnisa e mineronan y no Estado. Di otro banda, Bustos a señala cu el a “pasa e pagina” y no kier haya sa mas di e tema aki.
E accidente den e mina di San Jose, cu actualmente ta cera, a sucede dia 5 di augustus di 2010 ora un piedra di e grandura di un edificio a cay blokiando e entrada na e mina. E mineronan mester a sobrevivi bao tera hasta 13 di october di e aña ey ora nan a ser rescata un pa un.
