(AP) – Un tormenta inusual a converti e festival Burning Man den un desaster cu miles di persona pega den lodo sin bañonan cu ta funciona den medio di desierto na Nevada. Sinembargo algun di e personanan na Burning Man a bisa cu e emocionnan a permanece halto.
E organisadonan a cera festival pa vehiculonan despues cu un morto a keda reporta. Oficialnan no a provee detayenan di e fayecimento aki. E reunion anual aki na Black Rock Desert ta atrae casi 80.000 artista, musico y activista na un mescla di campamento y presentacionnan considera “Avant-garde”. Estorbonan ta parti di e evento su historia recien; E organisadonan mester a cera temporariamente e entrada di e festival den aña 2018 a causa di tormentanan di stof, y e evento a keda cancela dos biaha durante e pandemia.
Mas di 1.3 centimeter di yobida a cay na e festival riba diabierna, strobando e aña aki su festival. “Nos ta un poco sushi y cubri den lodo pero e emocionnan ta permanece halto. E fiesta ta sigui.” Scott London a splica, ken ta un fotografo, y el a agrega cu e limitacionnan di biahe a ofrece un “bista di Burning Man cu hopi di nos no ta logra mira.” Pa e area di Reno, cual ta mas o menos 227 kilometer leu di e festival, e yobida averahe pa henter e luna di September normalmente ta di 0.21 inch. “Ya caba, tur caminda desde Reno te na e area di Burning Man, Black Rock, ya caba a surpasa e nivelnan aki. Yobida di e area rond di e festival a cuminsa disminui riba diadomingo.
Ceramento di e cayanan a bini net prome cu mester a kima un estatua di palo riba diabierna anochi. E organisadonan a bisa cu tur e kimamento a keda posponi, y autoridadnan tabata trahando pa habri rutanan di salida pa fin di e weekend. Oficialnan a bisa fin di diasabra cu te ainda nan no sa ki tempo e cayanan aki “por ta suficientemente seco pa RV y vehiculonan pa nabega di manera safe,” pero nan tin speransa cu e vehiculonan por sali pa fin di dialuna si e condicionnan di tempo mehora.
President Joe Biden a bisa cu reporteronan na Delaware riba diadomingo cu e ta altanto di e situacion na Burning Man, incluyendo e fayecimento y cu e Cas Blanco ta den contacto cu e oficialnan local. Segun Biden, e no sa cua ta e causa di e fayecimento.
