Recientemente, Fundacion pa Gobernacion di Calidad Aruba (SDBA) a dirigi un carta abierto na minister di Integridad, Naturalesa, Transporte y Asuntonan di Adulto Mayor, Ursell Arends. Den e carta, ta pidi atencion pa un otro carta anterior cu e fundacion a manda na maart ultimo.
Tema: Recordatorio pa reaccion riba carta manda dia 21 di maart 2023
Dia 21 di maart ultimo (esta mas di 4 luna pasa!) nos a manda varios carta cu peticion/proposicion pa medio di bo e-mail. Mesun dia mi a entrega tur documentacion personalmente na bo consehero, Sr. Carlos Guiamo. Esaki mi a haci en bista cu despues di e cancelacion na ultimo ora riba dia 27 di februari, sin ricibi algun invitacion pa otro encuentro, despues,mi mester a biaha pa exterior pa un tempo largo.
Lamentablemente no tabatin ningun reaccion riba e cartanan. Esey ta hopi straño tumando na cuenta cu ta trata di tema cu bo propio partido a boga p’e prome cu eleccion (esta bon gobernacion den tur sentido) y cu ta trata di asunto cu ta cay specialmente bou di bo cartera. En corto y pa refresca memoria, ta trata di lo siguiente:
1- E carta na unda ta boga pa gobierno pidi excuus pa decada di mal gobernacion, locual a causa un debe y pago di interes practicamente impagable. Esaki ta un obstaculo importante pa un desaroyo sano di Aruba mientras cu tur ciudadano ta carga un suma substancial di debe riba su lomba. Tur gobierno cu a sinta, irespecto su color politico, a haci su mes culpabel na patronahe politico cu consecuencia financiero desastroso pa nos pais.
Hunto cu e cantidad di caso di corupcion cu a tuma luga na Aruba, esaki ta motibo principal di e falta casi completo di confiansa den gobernante/politico. P’esey ta na su luga pa gobierno reconoce e mal gobernacion cu a tuma luga y ta pidi publicamente excuus pa locual esaki a causa pa pueblo di Aruba. Si nos no ta ekiboca, bo partido a lanta hustamente pa combati mal gobernacion y realisa bon gobernacion!
2- E carta cu e tema di e acuerdo di LNG locual ta duna e impresion fuerte cu ta trata di un caso di nepotismo riba alto nivel cu e posibel intencion pa saca probecho personal di un embergadura financiero inmenso nunca antes bisto na Aruba. No ta por nada cu tanto e dos ministro y e dos parlamentario di Raiz a abstene nan sosten di e proyecto di LNG. Den e cuadro aki ta indispensabel cu bo persona como ministro di INTEGRIDAD (!!!) duna publicamente mas claridad al respecto.
3- E carta tocante compasion di personal ta un proposicion cu e potencial pa elimina un di e facetanan mas dañino di patronahe politico. Ta trata di un proposicion di parti di Sindicatonan Uni na aña 1995 pa caba cu e maneho iresponsabel di personal di parti di gobierno. Sin mas un condicion pa realisa bon gobernacion!
4- Prome cu esey nos a entrega un proposicion cu informacion extenso tocante un ‘panel di ciudadano’ pa
yuda realisa e ‘democracia participativo’ cu tambe ta un meta importante di Raiz.
Nos ta spera cu e biaha aki y dentro di poco nos por spera un reaccion al respecto y/of un encuentro personal.
E carta ta firma pa presidente di SDBA, Armand Hessels y su secretario Anselmo Pontilius. Un copia di e carta tambe a ser manda na Parlamento di Aruba.
Pa lesa mas tocante e topico aki, bishita: https://www.bondia.com/maneho-di-personal-den-gobierno-bon-gobernacion-ta-mal-politica/
.
