CEDE Aruba hunto cu IBISA y Gobierno di Aruba a anuncia e actividad Ban Caya. un actividad cu ta parti di e proyecto Barionan Unico na unda ta sostene iniciativanan di barionan di Aruba.
CEDE Aruba a cuminsa cu e proyecto di Barionan Unico pa brinda sosten na e barionan. Barionan Unico ta un proyecto cu ta ricibi sosten di Gobierno di Aruba, di Samenwerkende Fonds en Cariben y di diferente otro fondonan pa colabora hunto cu comunidad pa barionan mas sano
E meta di Ban Caya ta pa rebiba y reactiva e barionan y trece nan hunto pa actividadnan pa e comunidad por conoce nan bario, e organisacionnan cu tin den e bario, e sportnan cu ta wordo practica y mas.
E idea pa Ban Caya a lanta door cu IBISA ta conoci pa organisa ciclovia y mirando e impacto positivo di esaki den pueblo, CEDE Aruba continua esaki y trece e parti social mas cerca di pueblo.
Ban Caya ta bay wordo organisa na varios bario y durante e actividad e diferente barionan ta bay tin e oportunidad pa mustra kico tur nan por ofrece na nan residentenan.
E prome Ban Caya ta bay tuma luga den districto di Noord y a scoge e bario di Noord door cu segun data di CBS e ta un bario cu tin un poblacion grandi di mucha.
E prome Ban Caya ta bay tuma luga dia 10 di september for di 3or di atardi pa 7or di anochi. Durante e actividad lo tin presente diferente fundacion y organisacion riba caya. E actividad lo tuma luga riba e cayanan di noord, pa ta precies for di e salida di Colegio Felipe B. Tromp, pasa e rotonde di Compleho Deportivo Frans Figaroa y ta yega te na ultimo caya prome cu Imelda Hof
Ban Caya ta un proyecto di CEDE Aruba, IBISA y Gobierno di Aruba y nan uni pa haci un ciclovia pa no solamente haci actividad fisico, pero pa haci henter e comunidad di Noord consciente di kico su bario tin pa ofrece. No solamente den e parti di deporte, pero tambe diferente fundacion, diferente organisacion cu por duna nan conocemento na henter e bario di Noord
Ta bay tin diferente deporte cu ta bay wordo practica ariba caya, ta bay tin nutricionista, masahista, ta bay tin persona cu ta bay haci manicure y pedicure y mas. Ta importante pa remarca cu no solamente ta bay tin deporte, pero hopi otro cos tambe cu ta importante pa salud.
