Den edicion di Bon Dia Aruba di ayera, a publica informacion di un keho anonimo cu a drenta nos mesa di redaccion, indicando mal contento di algun ciudadano pa maneho di Hospital Dr. Horacio Oduber, specificamente tocante director di e hospital.
Anteriormente Bon Dia Aruba a publica tambe den su edicion di dia 9 di augustus un articulo den cual ta remarca e keho publico ariba Facebook di anestesiologo Ike Posner, cu a lamenta e retiro di Dr. Babet Latour Lamers pa atakenan personal y profesional.
Segun informacion anonimo cu nos a ricibi ta indica, ta existi bullying di parti di e director di Hospital y ta acus’e di ta terorisa dokternan Arubiano te cu hasta nan ta tuma nan retiro, pa no paga nan e pakete cu nan merece.
Mirando e acusacionnan serio cu a bin pa dilanti contra e director di hospital den e mesun luna, reportero di Bon Dia Aruba a acerca Minister di Salud, Dangui Oduber y a puntra si e ta na altura di e situacion y si tin pensa di haci un investigacion.
Minister Oduber a indica cu cualkier keho cu wordo entrega, hospital tin su Hunta di Supervision, Raad van Toezicht, cu ta consisti di shete miembro cu lo encarga di esaki. “Ta tarea di e Hunta di Supervision si tin keho contra e maneho cu ta wordo hiba na hospital, y sigur mi tin confiansa den e Hunta di Supervision cu nan lo sa di atende cu esaki,” el a bisa.
Minister Oduber a splica tambe cu normalmente hospital ta un Stichting cu ta los di gobierno y tur keho cu tin ta wordo atendi pa e hunta di supervision, manera cu a yega di sucede den pasado caba. “Den pasado esaki ya caba a yega di pasa cu e Hunta di Supervision a haya keho cu a wordo entrega contra diferente miembro di Raad van Bestuur y nan a atende cu esaki corectamente. Mi ta kere den cualkier situacion cu presenta nan lo sa di atende cu esaki tambe,” el a enfatisa.
