Dilanti di Misa Virgen di Fatima na Dakota boluntarionan di e bario di Dakota y Tarabana a bini hunto pa anuncia e accion di limpiesa grandi cu lo tuma lugar Diasabra 2 y Diadomingo 3 di september. Simbolicamente Ex-Prome Minister, Mike Eman, a wordo acompaña pa un cantidad di hobennan y representante di e mundo di deporte, e estelar di team di Dakota, Nickenson Paul y e rising star di e mundo di MMA, e hoben deportista, Sergio Tromp. Despues a sigui cu bishita den e bario pa duna informacion y parti saconan di sushi pa wordo recogi riba dia 2 y 3 di september.
Think common good
Riba e dianan di e accion grandi aki boluntarionan di e bario y di rond Aruba lo bini hunto cu truck y pickupnan cu lo pasa recoge saconan di sushi na practicamente tur caya di Dakota y Tarabana. Durante henter siman e boluntarionan di e accion “Common Good in Your Neigbourhood” lo pasa laga saconan di sushi na mas tanto adres posibel pa e casnan ta prepara pa entrega nan desperdicio na e truck y pickupnan cu lo pasa pa recoge esakinan dia 2 y 3 di september.
Frits de Palm
Netto Zara, John Goedhoop
Jossy Franken y Adelyn Olivieira
Di parti di e hobennan, Frits de Palm, a splica cu e esfuerso comunitario aki ta pa crea un conscientisacion mas grandi pa e prioridad cu nos tin cu duna na e BON COMUN como meta pa cambionan importante pa Aruba. “Nos hobennan ta mustra cu nos por ta boluntario pa cosnan positivo pa nos isla. Nos ta bay cada cas, cada caya den Dakota y Tarabana cu un “GREEN VIBE” como aliento alternativa pa Aruba”, e hoben entrepreneur Frits de Palm a splica.
Activistanan di Dakota y Tarabana, Netto Zara y John (Wowo) Goedhoop, Jossy Franken y Adelyne Olivieira a invita henter e bario pa ta presente. Representantenan di Dakota y Tarabana, Arthur Dowers y Clifford Heyliger, tambe a haci un yamada na e comunidad pa haci uso di e momento di e proyecto comunitario aki.
