(El Tiempo) – Den luna di augustus, prijs di gasolin a aumenta cu 600 peso, lagando un banda e balor pa galon na un promedio di 13.564 peso.
E medida a genera mal contento den e gremio di chauffeur. Nan ta bisa cu esaki ta afecta nan operacion y rentabilidad pa via di e aumento. Camara Intergremial de Transporte, conoci como Unidos, a anuncia cu ta forma parti di e jornada cu ta tumando luga na diferente ciudad.
E protestanan cu a tuma luga ayera na Bogota, Medellin y otro ciudad a ser promovi pa congresista Jennifer Pedraza y senador Jota Pe Hernandez, ken a traves di nan rednan social a invita e ciudadanonan pa participa.
Di su parti, presidente Gustavo Petro a referi na e situacion di gasolin na e pais, unda riba e plataforma social X a skirbi: “Mayoria di e flota di truck di e pais ta usa diesel y ta paga peajenan na careteranan di Colombia. E combustibel y peaje ta representa cerca di 85% di nan costo. Precisamente for di dia mi gobierno a cuminsa tanto diesel como peaje a congela nan prijs,” el a comenta.
Ademas, minister di Hacienda, Ricardo Bonilla a recorda cu Gobierno no a subi prijs di diesel e aña aki y cu no tin motibo pa chauffeurnan di truck haci menasa pa haci un welga general.
“Ta un obhetivo absolutamente electoral y politico cu nos no por acepta,” Bonilla a bisa.
Idea di gobierno ta cu prijs di galon di gasolin lo sigui subi y e aña aki por yega na 16.000 peso pa por yega na prijs internacional.
“Colombia ta un di e paisnan cu tin e prijs di gasolin y diesel mas barata di Latino America, debi na operacion di FEPC, cual a disminui e presion di inflacion di aumento di prijs di petroleo y su derivadonan den ultimo lunanan,” minister di Hacienda a señala.
