Diabierna 18 di augustus 2023 durante e celebracion di 100 aña di aviacion na Aruba Minister Maduro di Cultura a anuncia cu e edificio di Aeropuerto Dakota ta wordo designa como un monumento proteha di Aruba. Esaki ta bira e di dos edificio den man priva cu ta wordo proteha como monumento di nos Pais.
Durante su discurso Minister Maduro a splica cu e edificio di Aeropuerto Dakota ta un testimonio di nos pasado y un testigo bibo di nos historia y acontecimentonan cu a duna forma na nos industria di aviacion. Door di designa e edificio di Aeropuerto Dakota como monumento, nos ta compromete nos mes pa preserva y celebra e herencia rico aki pa e futuro generacion. E edificio di Aeropuerto Dakota no ta solamente bloki y cement, pero e ta refleha Aruba su identidad cultural. E ta encera e influencia architectico, artistico y social di su tempo.
Minister Maduro hunto cu director di Aruba Airport Authority Sr. Meijs y Sr. Gei di Monumenten Bureau a pone un seyo temporal di monumento riba e edificio di Aeropuerto Dakota. E mandatario a trece dilanti cu Monumenten Bureau hunto cu Aruba Airport Authority ta trahando duro riba e proceso pa e edificio di Aeropuerto Dakota pronto por ricibi e seyo oficial como un monumento historico. E seyo ta fungi como un simbolo di identificacion pa asina henter comunidad por ta na altura cu e monumento concerni ta inscribi den e registro di monumento y ta protegi pa ley. Na momento cu e edificio di Aeropuerto Dakota keda registra como un monumento historico, nos ta sigura e preservacion di nos identidad cultural y cu nos raiz por ta conecta cu nos futuro generacionnan y pa nan comprende e evolucion di nos sociedad.
Cu e hecho aki Aruba ta manda un mensahe fuerte cu nos Pais ta balora su historia y herencia. Esaki ta inspira un sentimento di orguyo y pertenencia entre nos ciudadanonan, fomentando un conexion mas profundo cu e pasado di nos nacion. Ademas ta proteha e edificio contra e crecemento continuo di nos aeropuerto y ta sigura cu e autenticidad di e edificio ta keda permanece intacto den e futuro desaroyo di nos aeropuerto. Na momento cu e edificio keda restaura den su gloria e lo tin tambe e potencial pa atrae turista-, local- y esnan entusiasma pa cu e mundo di aviacion. E lo por wordo uza tambe pa otro entretenimento pa henter nos comunidad y asina impulsa aun mas nos economia local. E mandatario ta encurasha residente-, historiado- y esnan entusiasma cu nos patrimonio y aviacion pa participa activamente den e preservacion y comparti e historia di e edificio di Aeropuerto Dakota.
E mandatario a finalisa su discurso gradiciendo den nomber di Gobierno di Aruba, Aruba Airport Authority pa e bunita gesto aki pa nos comunidad. Igualmente el a expresa un danki special na Monumenten Bureau kendenan hunto cu Aruba Airport Authority ta trahando duro pa pronto por designa e edificio di aeropuerto di Dakota como un monumento historico.
