Den fin di siman proximo ta bay tuma luga e segundo edicion di Aruba Dance Experience, un experiencia special pa tur persona cu ta amante di baile y pa tur cu kier siña baila tambe. Anthony Mezas, director di Aruba Dance Studios y fundador di Aruba Dance Congress ta conta Bon Dia Aruba mas di e evento y e meta tras di Aruba Dance Experience.
Aruba Dance Experience ta un iniciativa di Aruba Dance Studios unda cu ta invita varios instructor y grupo di baile pa bin Aruba y duna tayer- y shownan di baile, locual ta un intercambio di baile entre diferente cultura.
Aruba ta forma parti di Caribe y Sur America y pa motibo di esaki Aruba ta hopi conoci cu e genero di salsa, bachata, merengue y kizomba. “E idea ta pa trece hende hunto y disfruta di e isla pa medio di baile cu ta trece hende hunto, bo ta cera conoci cu hende, e ta dushi y ta un bon rato. Y e ta bon pa bo salud,” Mezas a indica.
El a splica cu na prome instante e idea tabata pa organisa den luna di september e congreso di baile, pero e aña aki e no a logra haya e fondonan necesario pa organisa e congreso internacional y a opta e ora pa pospone e segundo edicion di e congreso y organisa e segundo edicion di Aruba Dance Experience. Un di e motibonan cardinal y meta di Aruba Dance Experiencia ta pa crea Aruba como un destinacion di baile nobo.
Mezas a sigui splica cu esaki ta e di dos edicion di Aruba Dance Experience. Aña pasa e evento a bay hopi bon y tabatin apoyo di Corsou. E congreso di baile cu a tuma luga aña pasa tambe tabatin mas hende di afo, di Hulanda, Merca, Inglatera.
E aña aki Aruba Dance Experience ta mas internacional tambe, cual ta e idea y meta tambe pa crea Aruba como un centro di baile unda cu hendenan ta bin di afo pa duna les, y nan ta hendenan cu ta custumbra di duna les of shownan na festival of congresonan grandi internacional
“Loke nos kier purba di yega na dje ta pa localnan participa un poco mas y acepta e evento aki y pa nan participa sobretodo den e tayernan pasobra esey ta yuda nos mes crece den nos habilidadnan di baile. Esey ta un di e metanan e aña aki pa nos por purba yega na e pueblo di Aruba mas. Vooral e hobennan. No kier purba atrae hobennan di edad di 15 aña bay ariba pa nan participa den e lesnan y cu esey nos ta spera cu nan tambe ta haya un bon experiencia di e diferente tipo di bailenan,” Mezas a enfatisa.
Diferente persona of grupo ta bin di afo pa participa den e Aruba Dance Experience. Di Colombia ta bin e grupo renombra SalsaCapital. Cali Colombia ta conoci como e capital di salsa mundialmente, Mezas a indica, y shownan cu nan ta duna ta sumamente espectacular sumamente lihe, hopi energetico y ta inclui acrobacia durante baile. E grupo aki ta bay duna varios show durante e evento y nan ta bay duna tayer tambe.
For di Hulanda ta bin un pareha di bailado pa duna salsa ‘on one’, cu ta un otro estilo di baile. Di Merca ta bin Thomas Geurerro cu tambe ta un leyenda den su estilo di baile, New York of Mambo Style y lo ta dunando lesnan di cha cha cha tambe.
Aruba ta wordo representa pa Mezas hunto cu e bailarina conoci Janice Boekhoudt cu lo ta encarga cu e estilo di baile di Kizomba, cu ta hopi popular actualmente y tambe lady styling, cu ta specificamente pa hende muhe. Mezas lo ta e persona encarga cu les footwork di salsa y tambe bachata.
Mezas no ta desconoci cu mundo di baile ya cu desde chikito caba e tabata baila. El a conta cu su tata semper tabata scoge pa pone e toca disconan na cas y el a lanta desde chikito cu musica Latino. E tempo ey tabatin hopi concierto tambe di salsa na Aruba, pero a pesar di esaki su mes como hoben tabata mas tanto den e estilo di baile di break dance, den añanan 80, y e no tabata echt interesa den salsa.
Mezas a sigui conta cu na aña 2000 el a bay Hulanda y for di su punto di bista semper el a pensa cu salsa ta algo pa persona latino solamente y pa hende grandi mas tanto. Pero na momento cu el a yega Hulanda el a keda asombra di mira e cantidad di hobennan y persona cu no ta Latino ta baila salsa.
Poco poco el a cuminsa drenta den e mundo di salsa y na 2002 el a cuminsa cu e plataforma online yama salsacommunity.com. Danki na esey e tabata bay tur fiesta, fesitval, congreso, tur concierto, di salsa y musica Latino pa reporta y entrevista e artista- y musiconan.
Na 2007 Mezas a bin Aruba back y el a cuminsa duna les di salsa un poco, pero ainda e tabata wak e baile mas tanto como parti di su hobby y e no a worry mucho mas cu e mundo di salsa te cu na 2017 el a dicidi cu e ta bay cuminsa full for di cero cu un scol di baile. “Esey tabata algo cu no tabata plania y te dia di awe mi tin e sccol ainda,” el a remarca.
El a enfatisa cu Aruba Dance Studio tin su nomber estableci caba, pero ainda tin espacio pa sigui expande y e kier sigui desaroya e studio y keda trece baile en general, tur tipo di baile, pa un y tur. “Baile y bin hunto ta un di e miho remedinan cu tin pa hendenan cu tin inseguridad of cu tin stress etc.,” el a indica.
Aruba Dance Experience ta tuma luga dia 1, 2 y 3 di september y ta bay ta un fin di siman completamente yen di baile, musica, show, tayernan di diferente tipo di baile y hopi ambiente. Pa mas informacion pa e programa di actividad y carchi por bishita e website di Aruba Dance Studios.
