Diamars ultimo Prome Minister di Aruba Evelyn Wever-Croes a duna Parlamento di Aruba un splicacion riba re-financiamento di e debe di Covid. Durante e reunion di 10 ora, na unda por a scucha hopi critica riba e maneho di Gobierno, a reina e sintimento cu varios politico of oponente den Parlamento ni kier a trata e esencia di e reunion cu tawata supervision y re-financiamento pa trece solucion, pero mas bien kier critica e maneho di Gobierno cu a sa di hiba nos pais den recuperacion despues di un pandemia devastador.

Durante e reunion, e Prome mandadatrio di nos pais a mustra e importancia, cu hechonan, unda nos pais ta para financieramente, según un comunicado di gobierno. Prome Minister a remarca cu supervision financiero tey y e ta den e Landsverordening Aruba Financiel Toezicht, LAFT y ta acopla cu protocol y tur norma ta inclui den dje.

Prome Minister a sigui splica Parlamentarionan presente, cu tin un supervision cu a funciona den pasado y ta funcionando awo tambe. E echo cu tabatin menasa pa aanwijzing y despues a convence Hulanda pa no bin cu aanwijzing, ta hustamente prueba cu e sistema aki ta funciona. “Hulanda ta menasa y Gobierno di Aruba ta haci cambio y ta splica Hulanda cu kico Aruba ta di acuerdo y cu kico no ta di acuerdo. Despues ta yega na un final y esey ta mustra cu e supervision financiero ta traha”, Prome Minister a indica.

Prome Minister a expresa cu Gobierno di Aruba ta para pa supervision financiero y supervision financiero externo. Prome Minister a indica cu Gobierno ta haciendo tur posibel pa prome di September entrega Parlamento e ley cu e cambionan y cu esaki lo mehora e producto di supervision financiero.

Tres norma cu a palabra cu hulanda:

Gobierno ta aplicando un maneho financiero prudente y exitoso. Den e Rijkswet Aruba Financieel Toezicht, RAFT, tin tres norma cu a palabra cu Hulanda cu ta bay atene na dje. Maske cu Gobierno di Aruba no ta di acuerdo cu e RAFT, e tres normanan aki no tin discusion riba nan. Prome Minister a duna di conoce cu Gobierno di Aruba ya ta aplicando e normanan aki caba maske cu e RAFT no tey.

Begrotingsnorm:

E prome norma ta e ‘Begrotingsnorm’ unda a palabra cu Aruba lo percura pa den cada aña lo tin por lo menos 1% surplus. Aruba a logra esaki aña pasa y tin’e awor den presupuesto. Esey kiermen cu Aruba ta den cumplimento cu e begrotingsnorm.

Personeel lasten norm:

E di dos norma ta ‘Personeel Lasten Norm’, gasto di personal unda a palabra cu Hulanda cu e Personeel Lasten Norm ta bay bira 10% di GDP na aña 2027. Na e momento aki e ta rond di 11% di GDP y pa 2027 ta bay yega e 10% sin problema, Prome Minister a remarca. E proceso di ‘herstructurering di overheids organisatie’ lo bay indica cua tipo di servicio Gobierno mester bay duna y cua Gobierno no mester duna pa asina baha mas gasto.

Schuldenlasten norm:

E di tres ta schuldenlastennorm na unda cu e palabracion ta cu pa aña 2031, e debe di Aruba mester yega na 70% di e GDP y na aña 2040, e mester yega na 50% di e GDP. IMF ya a ya a confirma cu pa aña 2028, Aruba lo yega na 70% di e GDP. Aruba ta cumpli cu esaki tambe.

“Gobierno di Aruba ta cumpliendo cu tur tres norma riba e tereno financiero y por bisa cu orguyo. No ta solamente Gobierno di Aruba ta bisa esey, pero tambe IMF y Fitch a bisa esey y tambe CFT a confirma esaki. Nos no ta ainda unda mester ta, pasobra ta un pandemia a dal e pais aki, pero nos ta riba e bon caminda di recuperacion economico y recuperacion financiero”, Prome Minister Evelyn Wever-Croes a duna di conoce.