Aña escolar 2023 -2024 a cuminsa. Tin mucha ta contento paso nan a topa bek cu nan amigonan, tin mucha lo a prefera pa e vakantie ta un poco mas largo. Loke mayoria alumno- mayor- y docentenan ta preocupa pe, ta kico e alumnonan lo siña e aña aki y si na final di e aña escolar nan ta bay over.
Un factor di vital importancia cu sigur ta influencia e chens pa e alumnonan ta exitoso, ta e uzo di idioma pa duna les. Te ainda e idioma di enseñansa na Aruba ta Hulandes mientras, gran mayoria di alumno ta papia nos lenga materno Papiamento.
Durante un bishita na Filomena Colege MAVO na San Nicolas, mi a combersa cu directora di e scol Sra. Raquel Lampe y Sr. Addonsito Croes riba e topico aki. Mayoria alumno no ta compronde of domina e idioma Hulandes. Esaki ta causa cu e alumnonan no ta compronde e contenido di e les y ta djis siña for di cabes. Loke nan ta siña di berdad ta masha tiki mes. Esaki lo limita nan posibilidadnan pa sigui studia, limita nan posibilidad pa haya un diploma y pa haya e trabou cu nan ta desea. Tur esaki tin consecuencia pa nan bida profesional y social. Banda di e consecuencianan laboral y social, e lesnan duna na Hulandes por pone e alumnonan pensa cu nan ta e fout of cu nan no ta sabi, siendo cu esaki no ta e caso. Sra. Lampe ta determina claramente ‘nos muchanan NO ta dom ! Nos muchanan NO ta un failure!’. Mas miho un alumno compronde e materia den su lenga materno, mas miho e por compronde e contenido. Mirando e importancia di idioma den nos enseñansa, mi a dirigi un carta cu diferente pregunta na nos Minister di Enseñansa Sr. Endy Croes. Sperando cu pronto Parlamento di Aruba por ricibi contesta y/of informacion actualisa di con leu e proceso di maneho di idioma ta.
