Comision Vision Pedagogico consistiendo di Departamento di Asuntonan Social, Centro pa Hoben y Famia, Fundacion Pa Nos Muchanan, Stichting Witgelekruis, Fundacion Respeta Mi y Tienda di Educacion ayera mainta mediante un conferencia di prensa nan a informa cu nan ta bay haci un congreso pa parehanan organisa pa prome biaha na Aruba.

Pa esaki, Ivonne Bermudes coordinador di Centro pa Hoben y Famia a expresa cu e meta di e congreso aki titula “Cende e chispa den bo relacion” ta pa stimula y ofrece hermentnan cu informacion pa parehanan y otro personanan cu ta interesa den topico aki y asina por reconoce si ta den un relacion sano, con por mantene of activa e amor back den relacion.

E congreso aki ta bay tuma luga dia 3 di september na Renaissance Convention Center for di 9or di mainta te cu 4or di atardi completamente gratis. Pa participa tin cu registra na e number di telefon 699.8900 y 528.1200 y despues por pasa e busca e ticket na Centro di Hoben y Famia.

Den congreso ta bay tin tres orado cu ta bay ta na palabra y ta bay comparti diferente informacion, un di nan ta Enid de Kort ken ta un terapista di pareha y famia ademas di Dina Alexander ken ta un coach di Intimacy and Relationship y for di Corsou Dr. Sharroll Francisca ken ta un terapista di pareha y famia conoci pa bukinan y articulonan skirbi cientificamente.

Nan a tuma nota cu den comunidad tin hopi caso cu ta sucediendo, nan ta consciente cu e cifranan na Aruba ultimamente ta halto y nan como comision pedagogico ta trata y ta mira e necesidad pa conscientisa e comunidad di Aruba cu e impacto cu un relacion di pareha tin riba e muchanan y e siguiente generacion.

“Nos ta para pa lanta e muchanan den un ambiente sigur y cu amor, esaki ta encera tambe e relacion di pareha,” Bermudes a bisa.

Di su parti, Enid de Kort a trece dilanti cu nan tin e preocupacion cu tin hopi pareha cu por bay miho cu otro, nan cifranan di Departamento di Asuntonan Social seccion Bida y Famia den top 3 di e casonan pa mas o menos 20 aña caba ta problemanan di pareha, e titulo di su charla ta bay ta “E baile nobo den comunicacion” unda nan lo analisa con ta comunicando cu otro y den esaki el a sigura cu nan ta bay sigui organisa e tipo di actividadnan aki.

Pa e motibo aki, nan ta invita comunidad di Aruba pa por participa den congreso aki e proximo 3 di september proximo.