Dia 23 februari 2023 a ser incorpora na oficina di notario Rodriguez-Taekema e fundacion nobo cu nomber Caribbean Applied Engineering and Science Research Foundation, estableci na Aruba.
E obhetivo di e fundacion ta:
- promove investigacion di calidad halto, stimula investigacion den area specifico pa beneficio di sociedad;
- investigacion aplica y orienta riba practica pa e transferencia di conocemento y e desaroyo di conocemento y tecnologia pa empresa chikito y mediano y industria, y
- desaroya un base di apoyo y un infrastructura di investigacion pa ciencia, investigacion cientifico na Aruba y e colaboracion cientifico entre stakeholders relevante na Aruba, Union Europeo y e region di Caribe y Latino America.
Pa logra su obhetivo, e fundacion ta haci lo siguiente:
- realisa investigacion den instituto di investigacion bou propio maneho of den colaboracion cu otro instancia;
- organisa conferencia, congreso y tayer cientifico, destina pa trata cuestionnan (social) internacional, basa riba investigacion multidisciplinario, interdisciplinario y intersectorial y e colaboracion entre investigacion fundamental, aplica y orienta riba practica;
- organisa, apoya y stimula actividad, evenemento, reunion y proyecto destina pa crea conexion entre ciencia, sociedad y e comunidad empresarial;
- inicia, desaroya y (co)maneha infrastructura y instalacion tecnico pa investigacion fundamental, aplica y orienta riba practica, transferencia di conocemento y desaroyo di conocemento y tecnologia y
- inicia, desaroya y maneha science and technology parks na Aruba.
Ademas di e miembronan custumbra den un directiva, e directiva di e fundacion cu te hasta shete miembro ta conoce un coordinador di investigacion encarga cu maneho di e comision pa investigacion pa elabora vision, strategia, temanan central di investigacion y area di investigacion, y tambe tin un comision pa ciencia, sector priva y sociedad y un comision pa infrastructura tecnico y instalacionnan tecnico.
E directiva ta encarga cu e realisacion di investigacion aplica y orienta riba practica, sea internamente o dor di tercer partido den e contexto demarca pa programa di investigacion estableci y por establece instituto pa un periodo defini of indefini. drenta den of establece asociacion cientifico (sea den forma di instituto of no) y crea fondo pa apoya investigacion realisa pa tercer partido.
E fundacion ta conta cu un Comite Cientifico Asesor Internacional, cu tin como meta acesorio riba e strategia cientifico, e interpretacion di e vision, mision y programa di investigacion di e fundacion for di un perspectiva internacional.
Investigacion realisa internamente o pa tercer partido bou supervision di e fundacion of di su institutonan ta someti na codigo di conducta acepta internacionalmente y normanan prescrito of acepta internacionalmente pa e integridad di investigacion, en particular pa e maneho, organisacion y responsabilidad financiero di investigacion realisa, publicacionnan cientifico y propiedad intelectual inherente na of deriva di investigacion.
E fundacion ta registra na Camara di Comercio como un instituto di investigacion di biotecnologia, pero en termino mas general ta enfoca riba:
- Awa y sanitacion, energia renobabel y adaptacion climatico
- Agricultura, seguridad alimentario, seguridad pa consumo di cuminda y conservacion di biodiversidad
- Salud y ciencia di bida y biologico (bio and life sciences)
- Infrastructura di telecomunicacion, informacion y tecnologia y inteligencia artificial
E directiva ta consisti di Milton Ponson (presidente y coordinador di investigacion), Montsy Brouns (secretaria). Patricia Portier (miembro di directiva), Kirby Barrera (miembro di directiva) y Marina Silva (miembro di directiva).
Pa e creacion di e prome programa di investigacion multiannual, lo hiba combersacion cu gobierno, industria y actornan den e ambito cientifico e proximo lunanan, tanto na nivel local como internacional, y organisa reunionnan introductorio pa e comunidad empresarial y publico en general.
