(NLTimes)—Organisacionnan di studiante a priminti pa haci mas contra comportamento sexualmente transgresivo y pa interveni mas lihe ora tin keho di esaki. Comisionario di gobierno, Mariette Hamer, y 11 grupo di studiante na universidadnan HBO, WO y MBO a firma un pacto di 30 acuerdo ayera. Entre otro, nan a priminti pa apunta conseheronan confidencial pa sigura cu nan ta bon prepara pa un keho of un ofensa criminal manera abuso sexual of asalto.
“Atrobe e cantidad di keho ta afecta nos hopi,” manera Hamer a bisa. Dos di tres studiante a enfrenta comportamento sexualmente transgresivo durante nan estudio, segun e universidadnan di Leiden, Delft, Rotterdam y Maastricht a reporta den pasado a base di investigacion. Un den dies studiante femenino a experencia abuso sexual.
E Comisionario pa Gobierno pa Comportamento Sexualmente Transgresivo y Violencia Sexual a crea un pacto cu e grupo di 11 organisacion, incluyendo e asociacion di studiante L.S.V. Minerva y e grupo di Camara Nacional di Asociacion (LKvV) y JOB MBO. Awo, otro club di studiante tambe lo tin e oportunidad pa mira e acuerdonan y firma nan. Hamer ta spera cu nan lo haci esaki en masa.
Hamer a nota cu organisacionnan di studiante ta reconoce e problema y ta motiva pa resolve esaki pero frecuentemente no sa con pa haci’e. “Ademas, directivanan di studiante ta cambia tur aña, pues pa keda cu conocemento ta dificil.” E ta spera cu e acuerdonan por cambia esaki. E intencion ta no solamente pa interveni si cosnan bay robes pero pa haci e topico algo pa discuti.
