Diadomingo 27 di augustus Santa Rosa Aruba ta organisando e segundo Pop Up Market na unda pueblo di Aruba por pasa cumpra fruta, berdura, carni y pisca fresco na Santa Rosa y tur producto ta localmente produci. Di e forma aki comunidad por aporta na e sector di agricultura di Aruba.
Diferencia entre e iniciativa nobo aki di Pop Up Market y e mercadonan tradicional cu Santa Rosa Aruba ta realisa normalmente, ta cu e Pop Up Market ta specificamente pa e piscado-, cunukero- y criadornan di bestia pa asina nan por bende nan producto na Santa Rosa.
E mercadonan tradicional di Santa Rosa normalmente sa tin cuminsa crioyo na benta, diferente producto traha di yerba local y otro cosnan cu no lo ta na benta durante e Pop Up Market.
Durante e Pop Up Market Santa Rosa mes no ta bende nan propio productonan, pues nan ta enfoca ariba e cunukero-, piscado- y criadornan di bestia cu lo tey presente pa bende nan productonan.
E Santa Rosa Pop Up Market ta tuma luga diadomingo 27 di augustus for di 8or di mainta te cu 11or di mainta. Pa cualkier informacion of pregunta por tuma contacto cu Santa Rosa Aruba a traves di nan pagina oficial di Facebook of na telefon 5858102.
