E aanlegvergunning pa crea un beach dilanti Embassy Suites door di e desaroyado Natura N.V ta keda como uno relevante na unda cu dia 23 di juni ultimo Fundacion Aruba Birdlife Conservation (ABC) a solicita hues pa stop e proyecto di Embassy Suites na unda corte a honra e peticion aki.
Pa esaki, diamars ultimo minister di Naturalesa y Medio Ambiente Ursell Arends a senala cu na e momentonan aki departamentonan di Gobierno di Aruba envolvi cu e caso aki ta bezig ta procesando e peticion di ontheffing y alabes ta considerando un otro opcion cu a ser proponi na e desaroyado y manera minister Arends a sigura, nan ta spera cu den un tempo corto nan lo yega na un solucion.
Na luna di juli mediante un otro conferencia di prensa, minister Arends a splica cu con e procedura mester a cana, cual ta menciona cu tur proyecto cu impacto riba naturalesa mester un ‘ontheffing’. E ‘aanlegvergunning’ ta duna permiso pa haci algo, den e caso aki pa construi por ehempel. E ‘aanlegvergunning’ ta condicional na ‘ontheffing’ cual por ehempel ta tene cuenta cu especienan den nos naturalesa cu ta protegi y den e caso di Embassy tres marine bioloog a constata banda di e yerba di caña, diferente coralnan den e beach cu a pidi ‘aanlegvergunning’ p’e cual ta nifica cu e hecho ta cu Natura N.V. mester un permiso di excepcion(ontheffing). Arends a splica cu no ta tur construccion mester di un ontheffing, pero esaki si ta necesario ora ta trata di especienan protegi.
Tambe Arends a informa cu dia 6 di juli, el a tene un reunion cu Natura y for di e desaroyador su banda a indica cu nan lo pidi ‘ontheffing’ solamente si Gobierno di Aruba garantisa cu e ta wordo aproba. Arends a bisa cu esey no ta aceptabel y a wordo rechasa. Durante e mesun reunion, Minister Arends a propone un solucion cual ta encera pa desaroya e beach na banda pazuid, e propuesta a wordo rechasa rotundamente y Natura a scoge pa corte y publicidad, segun Arends a bisa.
Den transcurso di siguiente simannan email a drenta cerca ministerio unda ta menasa cu un caso di daño y perhuicio contra Gobierno di Aruba, cual tampoco ta aceptabel mirando cu cualkier perdida di Natura ta resultado di consehonan legal ekiboca. “E pregunta critico den e caso aki e ora ta bira, kende a crea e impresion cu Natura unda nos lo por “fix” e permisonan aki?”, Minister Arends ta reacciona.
Di su banda, na juni ultimo tambe prome minister Evelyn Wever-Croes tambe a reacciona na momento cu a bira conoci cu minister di Naturalesa a bay hues pa stop e actividadnan di desaroyo di Embassy Suites, indicando cu e tabata “sorprendi” pa e accion di abogado di ABC.
“Riba insistencia di prensa, prome minister Evelyn Wever-Croes a declara cu e mes ta sumamente sorprendi cu su colega minister a cuminsa un caso contra su mesun gobierno y pues su mes,” a indica a traves di un comunicado di prensa.
Pa loke ta trata e caso aki di Embassy Suites, prome minister a indica cu Embassy Hotel ta un proyecto di varios gobernacion, y cu e mes a yega y haya e proyecto cla. “Ta un hotel cu ta duna empleo na hopi mama y tata di famia local. Nan a haci un peticion pa por drecha e beach, y nan a haya promesanan di ministernan anterior. DIP a otorga e ‘aanlegvergunning’ pa nan drecha e beach completamente den cuadro di ley y teniendo na cuenta e consehonan di demas departamentonan, y hasta a inclui e recomendacionnan di Directie Natuur en Milieu (DNM) como condicion den e aanlegvergunning.
