(AP) – Gruponan di defensa di mucha, incluyendo Fairplay y Common Sense Media ta pidiendo e Comision Federal di Comercio di Merca pa investiga Google, bisando cu e gigante tecnologico ta duna avisonan personalisa na mucha riba YouTube, a pesar cu tin un ley federal cu ta prohibi e practica aki.
E carta ta yega despues di un reportahe di The New York Times siman pasa cu a haya cu aviso riba YouTube por a conduci na tracking online di mucha. E Ley federal di Proteccion di Privacidad di Mucha Online, conoci como COPPA pa su siglanan na Ingles, ta rekeri website orienta riba mucha pa haya permiso di mayornan prome cu por colecta informacion personal di muchanan menor di 13 aña di edad.
Como respuesta na e reportahe di The New York Times, Google a bisa siman pasa cu no ta pone aviso personalisa riba video di mucha y cu su practicanan di aviso ta cumpli completamente cu COPPA. Ora aviso ta aparece riba video pa mucha, e compania a bisa e corant, nan ta basa riba contenido di website, no enfoca riba perfil di usuario.
Pero e carta ayera na e FTC – tambe firma pa e nonprofit Center for Digital Democracy – ta bisa cu Fairplay, como tambe cumpradornan independiente di aviso, a haci investigacion di follow-up cu ta sugeri cu e avisonan, en berdad, ta personalisa. Nan a haci esaki door di ehecuta campañanan di aviso di test riba YouTube, selectando un serie di usuario di atributo y afinidad pa enfoca aviso riba nan, y a instrui Google pa presenta e avisonan solamente riba canalnan “traha pa mucha.”
Den teoria, e gruponan ta bisa, e campañanan di test aki lo mester a resulta den ningun aviso poni, pasobra bao politica di Google y YouTube, no mester por pone aviso personalisa riba videonan “traha pa mucha.” Pero Fairplay a bisa cu su campaña di aviso enfoca, cu a costa $10, a resulta den mas cu 1,400 impresion riba canalnan “traha pa mucha” y e cumpradornan di aviso a reporta resultadonan similar.
Google a bisa cu e conclusionnan di e rapport ta “punta riba un eror fundamental den e comprension di con aviso ta traha riba contenido traha pa mucha.”
“Nos no ta permiti personalisacion di aviso riba contenido traha pa mucha y nos no ta permiti esnan cu ta pone aviso enfoca riba mucha cu aviso riba ningun di nos productonan,” e compania a bisa den un declaracion. “Tampoco nos ta ofrece esnan cu ta pone aviso e opcion pa directamente enfoca riba contenido pa mucha en su totalidad. Mirando e acusacionnan, nos lo tabata desea pa e autor di e rapport tuma contacto cu nos prome.”
Su compania mama, Alphabet, na 2019 a bay di acuerdo pa paga $170 miyon pa resolve acusacionnan cu YouTube a colecta datonan personal di mucha sin permiso di nan mayornan.
Como respuesta, e compania a bay di acuerdo pa traha cu creadornan di video pa registra y label material enfoca riba mucha y a bisa cu lo limita colecta di data ora usuarionan mira e videonan asina, sin importa nan edad.
“Si e representacion di Google na esnan cu ta pone aviso cerca nan ta corecto, ta violando COPPA,” segun Josh Golin, director ehecutivo di Fairplay, a bisa den un declaracion. “FTC mester lansa un investigacion inmediato in comprensivo y usa su autoridad di citacion pa miho compronde e black box di Google pa aviso enfoca riba mucha.”
